جاپان میں پاکستانی سفارت خانے کے زیرِ اہتمام پاکستان کے یومِ آزادی کے موقع پر ایک شاندار اور پروقار تقریب کا انعقاد کیا گیا، جس میں جاپان میں مقیم پاکستانی کمیونٹی کی بڑی تعداد نے قومی جوش و جذبے کے ساتھ شرکت کی۔
تقریب کا آغاز پرچم کشائی سے ہوا، جہاں سفیرِ پاکستان عبدالحمید نے قومی پرچم سربلند کیا۔
اس موقع پر سفارت خانے کے افسران، عملے اور پاکستانی کمیونٹی کے ارکان نے سفیرِ پاکستان کے ہمراہ قومی ترانہ پڑھا، شرکاء میں وطن سے محبت اور قومی یک جہتی کا جذبہ نمایاں نظر آیا۔
تقریب سے خطاب کرتے ہوئے سفیرِ پاکستان عبدالحمید نے صدرِ پاکستان اور وزیرِاعظم پاکستان کے یومِ آزادی کے خصوصی پیغامات پڑھ کر سنائے، جن میں قوم کو آزادی کی مبارک باد دیتے ہوئے پاکستان کی ترقی، خوشحالی اور استحکام کے لیے متحد ہو کر کردار ادا کرنے کی ضرورت پر زور دیا گیا۔
اس موقع پر پاکستان کی تاریخ، ثقافت، قدرتی حسن اور قومی تشخص کو اجاگر کرنے والی خوبصورت ڈاکومینٹری بھی دکھائی گئی، جسے حاضرین نے بے حد سراہا۔
تقریب میں شریک پاکستانی کمیونٹی نے سفارت خانے کی جانب سے کیے گئے شاندار انتظامات کو سراہتے ہوئے وطن سے اپنی محبت کا اظہار کیا۔
تقریب کے اختتام پر فضا پاکستان زندہ باد کے پُرجوش نعروں سے گونج اٹھی، جبکہ شرکاء نے پاکستان کی سلامتی، ترقی اور خوشحالی کے لیے نیک تمناؤں کا اظہار کیا۔
