شوگر ملز مالکان چینی کی برآمد کے لیے ایک بار پھر متحرک ہوگئے، پاکستان شوگر ملز ایسوسی ایشن نے نائب وزیراعظم اور وزیر فوڈ سیکیورٹی کو خطوط لکھ دیے۔
پاکستان شوگر ملز ایسوسی ایشن نے حکومت سے 5 لاکھ 85 ہزار ٹن سرپلس چینی برآمد کرنے کا مطالبہ کیا ہے۔
پاکستان شوگر ملز ایسوسی ایشن کے خط میں کہا گیا کہ سرپلس چینی کو فوری برآمد کرنے کی درخواست کرتے ہیں۔
خط کے متن کے مطابق ملک میں 15 جولائی 2026 تک 34 لاکھ میٹرک ٹن چینی کے اسٹاکس موجود ہیں، چینی کی ملکی ماہانہ اوسط کھپت 5 لاکھ 67 ہزار میٹرک ٹن ہے۔
اس میں کہا گیا ہے کہ کرشنگ سیزن کے آغاز پر 11 لاکھ 58 ہزار ٹن چینی کا بڑا ذخیرہ موجود ہوگا، اگلے کرشنگ سیزن میں دوبارہ گنے کی بمپر فصل متوقع ہے۔ اس سے پھر ملکی ضرورت سے زائد 80 لاکھ میٹرک ٹن چینی پیدا ہوگی۔
شوگر ملز ایسوسی ایشن نے کہا کہ ستمبر کی کاشت بالکل قریب ہے اور گنے کے کاشتکار تذبذب کا شکار ہیں، اسٹریٹیجک ذخائر میں موجود اسٹاک سیزن شروع ہونے کے ایک مہینے کے اندر برآمد کیا جائے۔
