سابق پاکستانی کرکٹر شعیب ملک کے بیٹے اذہان مرزا ملک نے اپنے والد کو فٹبال کا دلچسپ چیلنج دے کر مداحوں کے دل جیت لیے۔
شعیب ملک ان دنوں دبئی میں اپنے بیٹے اذہان کے ساتھ وقت گزار رہے ہیں، دونوں کی ایک ویڈیو سوشل میڈیا پر وائرل ہورہی ہے جس میں باپ بیٹا فٹبال کھیلتے دکھائی دے رہے ہیں۔
ویڈیو میں اذہان نے والد کو چیلنج کرتے ہوئے کہا کہ گزشتہ مرتبہ ان کا دن اچھا نہیں تھا اور وہ میچ ہار گئے تھے، لیکن اس بار وہ جیتیں گے۔
اذہان نے 10 کوششوں میں 4 گول کرنے کا ہدف رکھا اور شرط عائد کی کہ اگر وہ جیت گئے تو شعیب ملک انہیں اسپائیڈر مین کی فلم دکھانے سنیما لے کر جائیں گے۔
دونوں کے درمیان خوبصورت باپ بیٹے کی یہ نوک جھونک اور کھیل کے لمحات سوشل میڈیا صارفین کو خوب پسند آرہے ہیں۔
مداحوں نے اذہان کی اپنے والد شعیب ملک سے غیر معمولی مشابہت کو بھی سراہا، جبکہ کئی صارفین نے شعیب ملک سے مزاحاً مطالبہ کیا کہ اس بار بیٹے کو جیتنے کا موقع ضرور دیں۔
