غیور کشمیریوں کی جانب سے کالعدم ایکشن کمیٹی کا بیانیہ مسترد ہونے پر سہولت کار بھارت خود کھل کر سامنے آ گیا۔
سیکیورٹی ذرائع کے مطابق قابض بھارتی فوج نے پاکستان مخالف جذبات ابھارنے کے لیے 13 اور 14 اگست کو کیرن سیکٹر میں کالعدم کمیٹی کی ویڈیو چلادیں۔
ماہرین کے مطابق کالعدم عوامی ایکشن کمیٹی کا بیانیہ چلانا بھارت کے گٹھ جوڑ کو ثابت کرتا ہے۔
جیو نیوز سے گفتگو میں دفاعی تجزیہ کار میجر جنرل (ر) زاہد محمود نے کہا کہ کالعدم ایکشن کمیٹی کے ساتھ بیرونی ہاتھ سے عوام باخبر ہیں، اس متعلق باوثوق ذرائع سے پہلے ہی اطلاعات تھیں۔
انہوں نے کہا کہ آزاد کشمیر سے متعلق ایک بیانیہ بنانے کی کوشش کی گئی، جس کا مقصد کشمیر کی آزادی کی تحریک کو نقصان پہنچانا تھا۔
میجر جنرل (ر) زاہد محمود نے کہا کہ اس سارے معاملے کے پیچھے بھارت جیسی ریاستیں، بین الاقوامی فورسز اور میڈیا گروپس ہیں، جو بیانیے کی تشکیل میں معاون ہیں۔
