سفیرِ پاکستان برائے ناروے سعدیہ الطاف قاضی نے سہارا ویلفیئر فاؤنڈیشن کے چیئرمین حافظ محمد اسلم حق کو کمیونٹی کی خدمت، پاکستان میں غریب، مساکین، یتیموں، بیواؤں اور سیلاب متاثرین کی امداد پر تعریفی سرٹیفکیٹ سے نوازا۔
اس موقع پر حافظ محمد اسلم حق نے بھی سعدیہ الطاف قاضی کی کمیونٹی کے لیے خدمات، پاکستان اور ناروے کے درمیان بہترین سفارت کاری اور دونوں ممالک کے تعلقات مضبوط بنانے میں کردار پر انہیں خراجِ تحسین پیش کیا۔
حافظ محمد اسلم حق نے سفیر پاکستان کا شکریہ ادا کرتے ہوئے ان کی نئی سفارتی ذمے داریوں کے لیے نیک خواہشات کا اظہار کیا اور دعا کی کہ اللّٰہ تعالیٰ انہیں مزید کامیابیاں، عزت، صحت اور سربلندی عطا فرمائے۔
واضح رہے کہ سعدیہ الطاف قاضی اپنی سفارتی مدت مکمل کرنے کے بعد آج ناروے سے روانہ ہو رہی ہیں اور بطور سفیر پاکستان تھائی لینڈ میں اپنی نئی ذمے داریاں سنبھالیں گی۔
