امریکی صدر ٹرمپ نے یو ایس ایس ابراہم لنکن سے متعلق خدشات کو مسترد کرتے ہوئے کہا ہے کہ طیارہ بردار بحری جہاز کی260 سے زائد دنوں کی تعیناتی طویل نہیں۔
ٹرمپ نے کہا کہ طیارہ بردار جہاز اس وقت یا بہت جلد روانہ ہورہا ہے، اس کی جگہ اسی نوعیت کا ایک اور جہاز تعینات کیا جارہا ہے۔
خبر ایجنسی کے مطابق طیارہ بردار بحری جہاز ساڑھے8 ماہ سے سمندر میں موجود ہے۔
یوایس ایس ابراہم لنکن گزشتہ سال نومبر میں سان ڈیاگو سےروانہ ہوا تھا، بعد میں ایران کے ساتھ جنگ میں حصہ لینے کے لیے مشرق وسطی بھیج دیا گیا۔
طیارہ بردار جہاز پر تقریباً 5 ہزار امریکی بحری اہلکار اور میرینز موجود ہیں، جہاز پر موجود امریکی فوجیوں کی طویل تعیناتی سے متعلق خدشات سامنے آئے تھے۔
فوجیوں کےاہلِ خانہ اور قانون سازوں نے ذہنی صحت اور جہاز پر بگڑتے ہوئے حالات کے بارے میں تشویش کا اظہار کیا تھا۔
سینیٹ کی آرمڈ سروسز کمیٹی کے ڈیموکریٹ رکن سینیٹر رچرڈ بلومینتھل نے بھی تشویش کا اظہارکرتے ہوئے کہا کہ جہاز نے200 سے زائد دنوں سے کسی بندرگاہ پر قیام نہیں کیا۔
سینیٹر رچرڈ بلومینتھل نے کہا کہ یہ کسی جہاز کے مسلسل سمندر میں رہنے کے حوالے سے جدید دور کا ریکارڈ ہے۔
متعدد ڈیموکریٹک اراکین نے فوجیوں کےاہل خانہ کی جانب سے اٹھائے گئے سوالات پر وضاحت طلب کی ہے۔
امریکی وزیر جنگ پیٹ ہیگستھ نے بھی جہاز پر حالات خراب ہونے سے متعلق رپورٹس کو مسترد کیا تھا۔
