فلم گھوسٹ اسکول کو سندھ میں نمائش کی اجازت نہ ملنے پر فلم سازوں نے سندھ ہائی کورٹ سے رجوع کر لیا۔
فلم سازوں نے سندھ بورڈ آف فلم سینسرز کے فیصلے کے خلاف عدالت میں درخواست دائر کر دی۔
درخواست گزار کے وکیل نے عدالت میں مؤقف اختیار کیا ہے کہ سینٹرل سینسر بورڈ اور پنجاب سینسر بورڈ فلم کی نمائش کی اجازت دے چکے ہیں۔
وکیل نے کہا کہ سندھ بورڈ آف فلم سینسرز فلم کی نمائش کے لیے منظوری نہیں دے رہا۔
درخواست گزار کے وکیل کا کہنا ہے کہ سندھ موشن پکچرز ایکٹ 2011ء کے تحت سینسر سرٹیفکیٹ سے انکار قانونی بنیاد پر ہی کیا جا سکتا ہے، تاہم سینسر بورڈ قوانین کے مطابق فلم کی نمائش پر پابندی کی کوئی وجہ نہیں۔
وکیل کا کہنا ہے کہ فلم سازوں کو نہ کوئی شوکاز نوٹس جاری کیا گیا نہ ہی مؤقف پیش کرنے کا موقع دیا گیا۔
سندھ ہائی کورٹ نے سندھ حکومت اور دیگر فریقین کو 21 اگست کے لیے نوٹس جاری کر دیے۔