بھارتی اداکار پرکاش راج نے جھارکھنڈ کے دارالحکومت رانچی میں احتجاج کرنے والے طلبہ کے خلاف پولیس کی جانب سے طاقت کے استعمال پر شدید ردِعمل کا اظہار کیا ہے۔
بھارتی خبر رساں ادارے اے این آئی کے مطابق جھارکھنڈ پبلک سروس کمیشن (JPSC) اور جھارکھنڈ اسٹاف سلیکشن کمیشن (JSSC) کے امیدوار جھارکھنڈ اسمبلی کی جانب مارچ کر رہے تھے، اس دوران پولیس نے مظاہرین کو منتشر کرنے کے لیے تیسری مرتبہ لاٹھی چارج کیا۔
پولیس کارروائی کے باوجود احتجاج کرنے والے طلبہ پیچھے ہٹنے پر آمادہ نہیں ہوئے اور اسمبلی کے باہر اپنا احتجاج جاری رکھا۔
پرکاش راج نے سماجی رابطے کی ویب سائٹ ’ایکس‘ اور انسٹا گرام پر احتجاج کے مقام سے مبینہ طور پر بنائی گئی ایک ویڈیو شیئر کی، جس میں پولیس کو مظاہرین کو منتشر کرنے کے لیے آنسو گیس اور لاٹھی چارج کرتے دیکھا جا سکتا ہے۔
ویڈیو کے ساتھ اداکار نے سوال اٹھاتے ہوئے لکھا، ’کیوں؟ کیوں؟ کیوں؟ یہ بربریت اب مزید کام نہیں کرے گی، بلکہ یہ صرف متکبر طاقت کے زوال کا باعث بنے گی۔‘
دوسری جانب احتجاج کرنے والے طلبہ کا کہنا ہے کہ وہ مسابقتی امتحانات میں مبینہ بے ضابطگیوں کے خلاف اپنی تحریک جاری رکھیں گے۔
مظاہرین نے معاملے کی تحقیقات کے لیے فوری طور پر مرکزی تحقیقاتی بیورو (CBI) سے تحقیقات کرانے کا مطالبہ بھی کیا ہے۔