قومی اسپرنٹر شجر عباس ٹانگ میں سرجری کے ایک سال بعد مکمل فٹ ہو گئے ہیں، وہ ایشین گیمز 2026ء میں 200 میٹر دوڑ میں پاکستان کی نمائندگی کریں گے۔
شجر عباس گزشتہ برس اگست میں ٹانگ کی سرجری کے باعث مقابلوں سے باہر ہو گئے تھے تاہم اب وہ لاہور کے پنجاب اسٹیڈیم میں انفرادی طور پر بھرپور ٹریننگ کر رہے ہیں۔
شجر عباس کا کہنا ہے کہ کم بیک میں مجھے ایک سال لگا لیکن میں نے ہمت نہیں ہاری اور سرجری کے صرف 8 روز بعد ہی بحالی کی مشقیں شروع کر دی تھیں۔
ان کے مطابق مسلسل محنت کے بعد وہ دوبارہ مقابلوں کے لیے تیار ہیں۔
انہوں نے کہا کہ میں کامن ویلتھ گیمز میں شرکت سے محروم رہا تاہم اب پوری توجہ ایشین گیمز 2026ء پر ہے۔
ان کا کہنا ہے کہ میں 200 میٹر دوڑ میں اپنی بہترین کارکردگی کے ساتھ میڈل جیتنے کی بھرپور صلاحیت رکھتا ہوں، اسی لیے میں نے 200 میٹر میں شرکت کا فیصلہ کیا ہے۔
شجر عباس نے اس بات پر افسوس کا اظہار کیا کہ ایشین گیمز کی تیاری کے لیے تاحال باقاعدہ تربیتی کیمپ قائم نہیں کیا گیا۔
ان کے مطابق تمام کھلاڑیوں کا ایک ساتھ ٹریننگ کرنا تیاری کے لیے انتہائی مفید ہوتا ہے۔
انہوں نے بتایا کہ فیڈریشن نے پاکستان اسپورٹس بورڈ کو کیمپ کے انعقاد کے لیے خط لکھ دیا ہے اور امید ہے کہ جَلد کیمپ شروع ہو جائے گا جس سے کھلاڑیوں کی تیاری مزید بہتر ہوگی۔
