رانا ثناء پرانے سیاسی بابے ہیں، ان بابوں کا علاج کاکروچ ہی ہیں، ندیم افضل چن

پاکستان پیپلز پارٹی (پی پی پی) کے رہنما ندیم افضل چن  کا کہنا ہے کہ رانا ثناء اللّٰہ پرانے سیاسی بابے ہیں ان بابوں کا علاج کاکروچ ہی ہیں، ن لیگ جتنی چاہے سیٹیں لے اصل بات یہ ہے کہ مینڈیٹ کتنا اصلی ہے۔

جیو نیوز کے پروگرام آج شاہزیب خانزادہ کے ساتھ میں گفتگو کرتے ہوئے ندیم افضل چن نے کہا کہ وزیراعظم آزاد کشمیر کے پاس کوئی اختیارات نہیں ہیں۔

اس سے قبل اسی پروگرام میں موجود رانا ثناء کا کہنا تھا کہ انتخابی نتائج سامنے آنے کے بعد پیپلز پارٹی نے شور مچانا شروع کردیا، پیپلز پارٹی اپنے لوگوں کا حوصلہ بڑھانے کے لیے بیانیہ چلانا چاہتی ہے۔

 رہنما مسلم لیگ ن کا کہنا تھا کہ پیپلز پارٹی صرف کابینہ میں شامل نہیں باقی ہر طرح سے حکومت میں شامل ہے، حکومت سازی کے دوران پیپلزپارٹی کے ساتھ جو معاہدہ ہوا تھا اس کے 16 سے 17 نکات تھے، جتنا عرصہ بھی پیپلز پارٹی کے ساتھ اتحاد قائم رہے گا ہم معاہدے پر عمل کرتے رہیں گے۔