چیئرمین پاکستان علما کونسل حافظ طاہر محمود اشرفی نے کہا ہے عازمین حج سعودی عرب کی وزارت حج و عمرہ کے جاری ضابطہ اخلاق پر عمل کریں۔
لاہور پریس کانفرنس سے خطاب کرتے ہوئے انہوں نے کہا سعودی عرب میں رہنے والے بغیر اجازت نامے کے حج نہ کریں، بغیر اجازت نامے کے حج شرعی و قانونی طور پر جائز نہیں۔
حافظ طاہر محمود اشرفی نے کہا کہ روانگی سے قبل مکمل معلومات حاصل کریں تاکہ مناسک حج و عمرہ میں مشکلات پیش نہ آئیں، حجاج پر لازم ہے وہ ضابطہ اخلاق اور سعودی قوانین کی پاسداری کریں۔
انہوں نے کہا دوران حج سیاسی میدان لگانے کی نہ خود کوشش کریں نہ کسی بھی ایسی کوشش کا حصہ بنیں، حتٰی الامکان عبادت کی ویڈیو اور تصاویر سے بھی اجتناب کریں۔
حافظ طاہر محمود اشرفی نے کہا کہ حج اور عمرہ کا بنیادی مقصد ہی اپنی انا، تکبر کو قربان کر کے اللّٰہ رب العزت کے سامنے اپنے آپ کو پیش کرنا ہے۔
انہوں نے کہا کہ ایئر پورٹ پر روانگی میں ہونے والی تاخیر پر پریشان ہونے کی بجائے اللّٰہ کا ذکر کریں۔ منیٰ، عرفات، مزدلفہ آتے اور جاتے ہوئے گروپ لیڈر کی ہدایات پر واضح طور پر عمل کریں۔
حافظ طاہر محمود اشرفی نے کہا کہ مملکت سعودی عرب میں بھیک مانگنا اور منشیات لے جانا بہت بڑا جرم ہے۔
