پاکستان کرکٹ بورڈ (پی سی بی) کے ڈائریکٹر ہائی پرفارمنس اور رکن سلیکشن کمیٹی عاقب جاوید نے انگلینڈ کے خلاف شکست کی ذمہ داری کپتان بابر اعظم پر ڈال دی۔
جیو نیوز کے پروگرام آج شاہزیب خانزادہ کے ساتھ میں میزبان شاہ زیب خانزادہ کے ساتھ گفتگو کرتے ہوئے عاقب جاوید کا کہنا تھا کہ اگر کھلاڑی بالکل پرفارم نہیں کر رہے ہوں تو سیریز کے مکمل ہونے کا انتظار نہیں کیا جاسکتا۔
انہوں نے کہا کہ دو ٹیسٹ میچز میں پاکستانی ٹیم مقابلہ بھی نہیں کرپائی۔ ٹیم سلیکشن کی ذمہ داری ہم لینے کو تیار ہیں۔
عاقب جاوید کا کہنا تھا کہ ٹیم میں جو فیصلے ہونے چاہیے تھے وہ نہیں ہو پارہے تھے۔ جب فیصلے نہیں ہو پارہے تو کچھ نہ کچھ تو کرنا تھا۔
انہوں نے یہ بھی کہا کہ دنیا ہم پرہنس رہی ہے کیونکہ ٹیم مقابلہ نہیں کر پارہی۔ 17 کھلاڑیوں کی ٹیم پر کسی کو شبہ نہیں تھا کہ بہتر ٹیم نہیں ہے۔ ہم کھلاڑیوں کویہ پیغام دے رہے ہیں کہ پرفارمنس دکھائیں۔
خیال رہے کہ انگلینڈ کے خلاف تین ٹیسٹ میچز کی سیریز میں قومی ٹیم ابتدائی دو میچز میں ہی شکست کھا بیٹھی ہے۔
پی سی بی نے انگلینڈ سیریز کے درمیان میں ہی ہیڈکوچ و بولنگ کوچ کے ساتھ ساتھ 7 کھلاڑیوں کو اسکواڈ سے ریلیز کردیا ہے۔