میر رضا کیس میں وزیراعلیٰ خود تو تحقیقات نہیں کرسکتے اس لیے جوڈیشل کمیشن بنانے کا فیصلہ کیا، مرتضیٰ وہاب

میئر کراچی مرتضیٰ وہاب کا کہنا ہے کہ حکومت سندھ نے میر رضا قتل کے حوالے سےکچھ فیصلے کیے ہیں، وزیراعلیٰ خود تو تحقیقات نہیں کرسکتے اس لیے جوڈیشل کمیشن بنانے کا فیصلہ کیا، یہ فیصلے ہم عوام تک پہنچانا چاہتے ہیں۔

کے ایم سی ہیڈ آفس میں پریس کانفرنس کرتے ہوئے میئر کراچی مرتضیٰ وہاب نے کہا کہ مرحوم میر رضا کی فیملی کے غم میں برابر کے شریک ہیں، جس نے یہ سفاک کام کیا ہے جو موت کا باعث بنا وہ منظر عام پر آنا چاہیے، جو کوئی بھی قصور وار ہے اسے سزا ملنی چاہیے۔

میئر کراچی مرتضیٰ وہاب نے کہا کہ میں دو بار مرحوم کے گھر گیا ہوں اور گفتگو کی اور حکومتی پیغام پہنچایا، ایک بار وزیر داخلہ بھی میرے ساتھ تھے، میر رضا کے اہل خانہ کا کہنا ہے کہ پولیس کے خلاف محکمانہ کارروائی ہونی چاہیے،  کمیشن نے پولیس کے تفتیش سے متعلق کردار اور کیس کے دیگر پہلو کو بھی دیکھنا تھا، حکومت کی ترجیح میر رضا کے اہلخانہ کو مطمئن کرنا ہے۔

مرتضیٰ وہاب نے کہا کہ کابینہ سے جوڈیشل کمیشن بنانے کی منظوری لی گئی،  کابینہ کی منظوری کے بعد چیف جسٹس سندھ کو خط لکھا گیا، جوڈیشل کمیشن کے پاس 30 دن ہوں گے کہ حقائق تک پہنچا جائے اور رپورٹ مرتب ہو۔