بالی ووڈ اداکار گووندا کی اہلیہ سنیتا آہوجا نے شوہر کی مبینہ گرل فرینڈ، اداکارہ کومل رانی سوارنکر کے ساتھ اداکار کی مسلسل ملاقاتوں پر ایک بار پھر شدید تنقید کی ہے۔
سنیتا نے کہا ہے کہ گووندا کو اپنی بیٹی کی عمر کی لڑکی کے ساتھ گھومتے ہوئے کچھ شرم آنی چاہیے۔
انہوں نے کومل کے لباس پر بھی طنز کرتے ہوئے کہا کہ اگر شوگر ڈیڈی اتنا امیر ہے تو کپڑے بھی ڈھنگ کے پہننے چاہئیں، گووندا کا دماغ خراب ہو چکا ہے۔
واضح رہے کہ گووندا اور کومل رانی اپنی آنے والی فلم ’روپا‘ کی تشہیری سرگرمیوں کے باعث حالیہ دنوں میں توجہ کا مرکز بنے ہوئے ہیں، دونوں کو پہلے ممبئی ایئر پورٹ پر ایک ساتھ دیکھا گیا جس کے بعد پرانے افیئر کے الزامات دوبارہ زیرِ بحث آ گئے۔
صحافیوں سے تازہ گفتگو میں سنیتا نے فلم کی تشہیر پر بھی سوال اٹھاتے ہوئے کہا کہ فلم بننے کے بعد تشہیر ہوتی ہے یہاں تو فلم مکمل ہونے سے پہلے ہی تشہیر شروع کر دی گئی۔
یاد رہے کہ سنیتا اس سے قبل بھی کومل کو گووندا کے ساتھ مبینہ تعلقات کے حوالے سے تنقید کا نشانہ بنا چکی ہیں۔
انہوں نے اپنے ایک بیان میں کہا تھا کہ کومل شوگر ڈیڈی کی تلاش میں ہیں اور مبینہ طور پر گووندا کو بلیک میل کر رہی ہیں، سنیتا نے یہ بھی کہا تھا کہ مجھے کومل نام سے ہی نفرت ہے۔
دوسری جانب گووندا نے کومل کے خاموش رہنے کی تعریف کرتے ہوئے کہا تھا کہ اداکارہ کے عوامی سطح پر جواب نہ دینے سے میں مزید مشکلات سے بچ گیا ہوں۔