امریکی سینیٹر رچرڈ بلومینتھل نے وزیرِ دفاع پیٹ ہیگستھ اور قائم مقام سیکریٹری نیوی ہنگ کاؤ سے یو ایس ایس ابراہم لنکن کے حالات سے متعلق جواب طلب کرلیا۔
امریکی بحریہ کا طیارہ بردار جہاز یو ایس ایس ابراہم لنکن گزشتہ 250 سے زائد دنوں سے سمندر میں موجود ہے۔
سماجی رابطے کی ویب سائٹ ایکس پر پوسٹ کرتے ہوئے رچرڈ بلومینتھل نے پیٹ ہیگستھ اور ہنگ کاؤ کو بھیجے گئے خط کی کاپی منسلک کی ہے۔
انہوں نے لکھا کہ ٹرمپ انتظامیہ کو وضاحت کرنی چاہیے کہ وہ یو ایس ایس ابراہم لنکن پر تعینات بحری اہلکاروں کی معاونت کے لیے کیا اقدامات کر رہی ہے جو تقریباً 7 ماہ سے مسلسل سمندر میں ہیں۔
انہوں نے مزید کہا کہ رسد کی قلت، پلمبنگ کے مسائل، ذہنی صحت کی بگڑتی صورتحال اور دیگر مشکلات سے متعلق بڑے پیمانے پر سامنے آنے والی رپورٹس فوری توجہ کا تقاضا کرتی ہیں۔
واضح رہے کہ یو ایس ایس ابراہم لنکن اُس وقت سے سمندر میں ہے جب جنوری کے آخر میں امریکی بحری بیڑے کی تعیناتی میں اضافہ کیا گیا تھا۔
ایران کے خلاف جنگ شروع ہونے سے قبل ٹرمپ انتظامیہ نے یو ایس ایس ابراہم لنکن اسٹرائیک گروپ کو جنوبی بحیرۂ چین میں جاری بحری مشقوں سے ہٹا کر مشرقِ وسطیٰ کی جانب روانہ ہونے کا حکم دیا تھا۔
