مقبوضہ مغربی کنارے کے قصرا گاؤں میں غیرقانونی اسرائیلی قابضین نے تین فلسطینی خاندانوں کے گھروں کا محاصرہ کر رکھا ہے، اس دوران سڑکیں بند کرکے پانی اور بجلی کی فراہمی منقطع کر دی۔
اقوام متحدہ کے مطابق تقریباً 15 فلسطینی، جن میں دو بچے بھی شامل ہیں، بنیادی ضروریات اور پانی و بجلی سے محروم گھروں میں محصور ہیں، گھروں پر پتھراؤ بھی کیا گیا۔
اسرائیلی فوج نے غیر قانونی آبادکاروں کو ہٹانے کے لیے کارروائی شروع کر دی اور دو غیر قانونی چوکیوں کو ختم کرکے ایک اسرائیلی کو حراست میں لینے کا دعویٰ کیا ہے۔
تاہم مقامی افراد کے مطابق غیر قانونی اسرائیلی آبادکار اب بھی قریبی علاقوں میں موجود ہیں، امریکی سفیر مائیک ہکابی نے آبادکاروں کے اقدام کی مذمت کرتے ہوئے اسے خوفناک اور ناقابلِ جواز قرار دیا۔
امریکی سفیر نے کہا خاندانوں کو خوفزدہ اور ہراساں کرنے کے لیے دہشت گردی کا یہ ہولناک فعل انجام دینے والوں کے اقدامات گھناونی حرکت ہے۔