پاکستان تحریک انصاف ( پی ٹی آئی) رہنما شفیع جان نے تصدیق کی ہے کہ راولپنڈی مال روڈ پر ہلاک ہونے والا شخص پی ٹی آئی کا کارکن تھا۔
جیو نیوز کے پروگرام کیپٹل ٹاک میں گفتگو کے دوران شفیع جان نے مان لیا کہ فورسز کی کارروائی میں ہلاک ہونے والا محمد حسین ضلع خیبر کا رہائشی تھا۔
انہوں نے کہا کہ اس کا تعلق ایم پی اے عبدالغنی کے حلقے سے ہے، تاہم اس کے پاس کوئی پارٹی عہدہ نہیں تھا نہ ہی اسے کوئی ذمے داری سونپی گئی۔
دوران پروگرام شفیع جان نے سیکیورٹی فورسز کے اہلکار پر فائرنگ کی مذمت کی اورکہا کہ اس واقعے کو تحریک انصاف کے ساتھ جوڑنا زیادتی ہے۔
اُنہوں نے راولپنڈی مال روڈ واقعے کی سی سی ٹی وی ویڈیو سامنے لانے اور مکمل تحقیقات کا بھی مطالبہ کیا۔
وفاقی وزیر ڈاکٹر طارق فضل چوہدری نے کہا کہ تحریک انصاف کے رہنماؤں کے اشتعال انگیز بیانات کی وجہ سے کارکن اس طرح کی حرکتیں کرتے ہیں، راولپنڈی کے واقعے کی تحقیقات ہو رہی ہیں۔