مشیر وزیرِ خزانہ خرم شہزاد نے کہا ہے کہ مالی سال 26-2025ء میں نجی شعبے کو دیے گئے قرضوں میں تقریباً 15 فیصد اضافہ ریکارڈ کیا گیا جو گزشتہ 4 برسوں کی بلند ترین سطح ہے۔
خرم شہزاد نے کہا ہے کہ نجی شعبے کو فراہم کیے گئے قرضوں کا حجم 11.38 کھرب روپے تک پہنچ گیا ہے، نجی شعبے کو مالی معاونت سے کاروباری اور پیداواری سرگرمیوں کو فروغ ملا ہے جبکہ 89 فیصد نئے قرضے مینوفیکچرنگ، تھوک و پرچون تجارت اور زراعت کے شعبوں کو دیے گئے۔
ان کا کہنا ہے کہ صرف مینوفیکچرنگ شعبے کو 657 ارب روپے کے نئے قرضے فراہم کیے گئے جو صنعتی سرگرمیوں اور پیداواری صلاحیت میں توسیع کی عکاسی کرتے ہیں۔
خرم شہزاد نے کہا کہ تجارت اور زراعت کے شعبوں کو مالی معاونت سے پیداوار، کاروباری سرگرمیوں اور نجی سرمایہ کاری میں بہتری آئی ہے۔
انہوں نے یہ بھی کہا کہ نجی شعبے میں بڑھتے قرضے کاروباری اعتماد اور معاشی استحکام کی جانب مثبت پیش رفت کا مظہر ہیں۔