بھارت میں کانگریس رہنما راہول گاندھی پر تنقید کرنے والی ایک اسسٹنٹ پروفیسر کی سوشل میڈیا پوسٹ الٹا ان کے لیے باعثِ تنقید بن گئی، صارفین نے ان کے سیاسی مؤقف کے بجائے انگریزی گرامر کی غلطیوں کو نشانہ بنانا شروع کردیا۔
ارپیتا چٹرجی نامی خاتون جنہوں نے خود کو مغربی بنگال کی ایک اسسٹنٹ پروفیسر قرار دیا، انہوں نے سوشل میڈیا پلیٹ فارم ایکس پر دعویٰ کیا کہ ان کے پاس انگریزی اور ایجوکیشن میں دو ماسٹرز ڈگریاں ہیں، بی ایڈ کی ڈگری بھی رکھتی ہیں اور پی ایچ ڈی کر رہی ہیں۔
اپنی پوسٹ میں انہوں نے راہول گاندھی سے مخاطب ہو کر لکھا کہ محترم راہول گاندھی میں ایک فخر کرنے والی ‘اندھ بھکت’ اور اسسٹنٹ پروفیسر ہوں۔
انہوں نے کہا کہ میرے پاس انگریزی اور ایجوکیشن میں دو ماسٹرز ڈگریاں ہیں، بی ایڈ بھی کیا ہے اور پی ایچ ڈی کر رہی ہوں۔ آپ کے مطابق اندھ بھکت ایک احمق ہوتا ہے، تو کیا میں احمق ہوں؟ کیا آپ کو یقین ہے؟
تاہم یہ پوسٹ سیاسی بحث کے بجائے گرامر کی غلطیوں کی وجہ سے وائرل ہو گئی، جس پر سوشل میڈیا صارفین نے انہیں تنقید کا نشانہ بنانا شروع کردیا۔
بعض صارفین نے طنزیہ انداز میں کہا کہ انگریزی میں ماسٹرز کرنے والی شخصیت سے ایسی غلطیاں غیر متوقع ہیں، جبکہ کئی افراد نے تبصرہ کیا کہ یہ پوسسٹ سیاسی بیان سے زیادہ گرامر کے سبق میں تبدیل ہو گئی۔
