حسن احمد کی فہد شیخ پر شدید تنقید

پاکستان شوبز انڈسٹری کے معروف اداکار حسن احمد نے اداکار فہد شیخ کو سینئر اداکار سید محمد احمد کے ساتھ نامناسب سلوک کرنے پر شدید تنقید کا نشانہ بنایا ہے۔

حسن احمد نے اپنی انسٹا اسٹوری میں فہد شیخ کے ساتھ کام کرنے کے اپنے تجربے کا حوالہ دیتے ہوئے ان پر یہ الزام عائد کیا ہے کہ فہد اسمارٹ بننے کی کوشش میں اکثر لوگوں کا مذاق اڑاتے ہیں۔

انہوں نے فہد شیخ سے مخاطب ہوتے ہوئے لکھا ہے کہ میں نے آپ کے ساتھ کام کیا اور ان تمام سالوں کے دوران جتنا میں نے آپ کو جانا ہے اس کے مطابق آپ تقریباً سب کا ہی مذاق اڑاتے ہیں۔

اداکار نے لکھا کہ آپ ان لوگوں میں سے ہیں جہنیں لگتا ہے کہ دوسروں کا مذاق اڑاتے ہوئے وہ اسمارٹ لگیں گے۔

انہوں نے یہ بھی لکھا ہے کہ وائرل ویڈیو میں آپ اور آپ کے ساتھ دیگر جو لوگ نظر آ رہے ہیں ان سب کا بائیکاٹ ہونا چاہیے۔