ایوارڈ یافتہ ٹی وی اداکار اور اپوزیشن میئر اردال بشکچی اوغلو کو بدعنوانی کے الزامات میں گرفتار کر لیا گیا۔
غیر ملکی میڈیا کی رپورٹس کے مطابق انقرہ کے پراسیکیوٹرز کا کہنا ہے کہ 56 سالہ اردال بشکچی اوغلو ترکیہ کی مرکزی اپوزیشن جماعت ری پبلکن پیپلز پارٹی (سی ایچ پی) کے ان درجنوں رہنماؤں میں شامل ہیں جنہیں گزشتہ روز بدعنوانی کے خلاف کی جانے والی قانونی کارروائیوں میں گرفتار کیا گیا۔
پراسیکیوٹرز نے ایک بیان میں کہا ہے کہ انقرہ کے علاقے کے 9 صوبوں میں بیک وقت کارروائی کی گئی، جس میں 55 مشتبہ افراد کو نشانہ بنایا گیا۔
انہوں نے بتایا کہ ان کارروائیوں میں اتیمسگٹ کے میئر اردال بشکچی اوغلو، 42 بلدیاتی ملازمین اور 13 کاروباری شخصیات شامل ہیں، جن پر ایک مجرمانہ تنظیم قائم کرنے، اسے چلانے اور بدعنوانی کے الزامات ہیں۔
رپورٹس کے مطابق اپوزیشن جماعت کا کہنا ہے کہ یہ اقدامات سیاسی مہم کا حصہ ہیں، اس وقت سی ایچ پی سے تعلق رکھنے والے کم از کم 28 میئرز اور سینکڑوں پارٹی عہدیدار زیرِ حراست ہیں۔
یہ تحقیقات اتیمسگٹ بلدیہ کی جانب سے جاری کیے گئے ٹینڈرز میں مبینہ بے ضابطگیوں سے متعلق ہیں۔
بشکچی اوغلو نے 2024ء میں ترکیہ کے دارالحکومت انقرہ کے قریب واقع شہر اتیمسگٹ کے میئر کا منصب سنبھالا تھا، جہاں کی آبادی تقریباً 6 لاکھ ہے۔
انہیں معروف ڈرامہ سیریز بہزاد جے میں نظام کے خلاف جدوجہد کرنے والے تفتیش کار کے کردار سے ملک گیر شہرت حاصل ہوئی۔
