امریکی سائنسدانوں کی ایک تازہ تحقیق میں اس بات کا انکشاف ہوا ہے کہ گھنٹوں ہلکی ورزش کرنے کے بجائے چند منٹ کی انتہائی شدید ورزش جسم کو کہیں زیادہ طبی فوائد پہنچاتی ہے۔
جریدے سیل رپورٹس میڈیسن میں شائع ہونے والی اس تحقیق کے مطابق ایکسرسائز بائیک پر 30، 30 سیکنڈز کی شدید تیز رفتار سائیکلنگ (جس کے درمیان 4 منٹ کا وقفہ ہو) سے خون میں صحت سے متعلق 714 پروٹینز میں مثبت تبدیلیاں دیکھیں۔ اس کے مقابلے میں نارمل رفتار سے سائیکلنگ سے صرف 7 پروٹینز متاثر ہوئے۔
اس شدید ورزش سے ‘Lac-Phe’ نامی مالیکیول کی مقدار بڑھ جاتی ہے جو بھوک کو کنٹرول کرتا ہے اور چکنائی کے خلیوں میں 1,600 سے زائد جینز کو فعال کر کے چربی پگھلانے کی صلاحیت بڑھاتا ہے۔
53 ہزار سے زائد افراد کے ڈیٹا کے تجزیے سے پتہ چلا کہ اس ورزش سے فعال ہونے والے پروٹینز کا تعلق دل کی بیماریوں، ٹائپ-2 ذیابیطس، موٹاپے کے کم خطرے اور عمر کے اثرات کو سست کرنے سے ہے۔
تحقیق کے سربراہ ڈاکٹر پال کوہن کے مطابق یہ بات انتہائی دلچسپ ہے کہ محض چند منٹ کی شدید ورزش جسم کے اندر ایک زبردست مثبت ردِعمل پیدا کرتی ہے، جو مصروف زندگی رکھنے والوں کے لیے بہترین ہے اور اس کے لیے گھنٹوں کا وقت درکار نہیں ہوتا۔
