سینئر وزیر شرجیل انعام میمن نے سوشل میڈیا پر مبینہ کردار کشی کے خلاف نیشنل سائبر کرائم انویسٹی گیشن ایجنسی (این سی سی آئی اے) سے رجوع کر لیا، اپنے اور اپنے بیٹے راول میمن کے خلاف سوشل میڈیا پر مبینہ جھوٹے، من گھڑت اور بدنیتی پر مبنی الزامات کی تشہیر کے خلاف 9 اگست کو باقاعدہ تحریری شکایت جمع کرا دی۔
شرجیل میمن کے مطابق 9 اگست 2026 سے کچھ سوشل میڈیا اکاؤنٹس، پیجز اور گروپس پر شرجیل انعام اور ان کے بیٹے راول میمن کے خلاف جھوٹے، بے بنیاد اور بدنیتی پر مبنی بیانات اور پوسٹیں آنا شروع ہوئیں۔
شرجیل میمن کے مطابق سوشل میڈیا پر الزام عائد کیا گیا کہ گلستانِ جوہر کراچی میں واقع گیسٹ ہاؤس شرجیل میمن کی ملکیت ہے جہاں مبینہ طور پر میر علی رضا کو تشدد کا نشانہ بنا کر قتل کیے جانے کا دعویٰ کیا گیا ہے۔
درخواست گزار کے مطابق اس مواد کا مقصد ان کی ساکھ، عزت اور معاشرتی حیثیت کو نقصان پہنچانا ہے۔
شرجیل میمن نے اپنی شکایت میں اکاؤنٹس سے متعلق اسکرین شاٹس بھی منسلک کیے ہیں اور اپنی عزت و شہرت کو نقصان پہنچانے کے الزامات عائد کیے ہیں۔
شرجیل میمن نے مطالبہ کیا کہ معاملے کا فوری نوٹس لے کر تحقیقات کی جائیں۔
