لندن: بڑھتے ہوئے اخراجاتِ زندگی سے پریشان عوام کی زندگی آسان بنانے کے لیے وزیرِاعظم اینڈی برنہم آئندہ ہفتے متعدد اقدامات کا اعلان کریں گے۔
نمبر 10 ڈاؤننگ اسٹریٹ کے ترجمان کے مطابق وزیرِ اعظم کے ان اقدامات کا مقصد مہنگائی سے متاثرہ لوگوں کو کچھ ریلیف فراہم کرنا ہے۔
وزیرِ اعظم برطانیہ بھر کے دورے کے دوران عوام کی بات سنیں گے اور انہیں امید دلانے اور ملک کو خوشحال بنانے کے لیے 10 سالہ منصوبے پر کام کریں گے، وہ ہائی اسٹریٹ کو بہتر بنانے کے طریقوں پر بھی توجہ دیں گے۔
تاہم خیال کیا جا رہا ہے کہ انہیں انگلینڈ اور ویلز میں قیدیوں کی جلد رہائی کی اسکیم خصوصاً مقتول پولیس افسر اینڈریو ہارپر کے قاتلوں کی رہائی کے حوالے سے شدید تنقید کا سامنا کرنا پڑ سکتا ہے۔
کنزرویٹو پارٹی نے کہا ہے کہ حکومت کی جانب سے ٹیکسز میں اضافے اور ریڈ ٹیپ نے ہائی اسٹریٹ کو نقصان پہنچایا ہے جبکہ دوسری جانب خطرناک مجرموں کو رہا کیا جا رہا ہے۔
لب ڈیم کی ٹریژری ترجمان ڈیزی کوپر نے کہا کہ ہائی اسٹریٹ کو وزیرِ اعظم کے نمائشی دورے کے بجائے عملی اقدامات کی ضرورت ہے۔
دوسری جانب ریفارم یو کے کے اقتصادی امور کے ترجمان رابرٹ جینرک نے کہا کہ اگر حکومت واقعی عوام کی مدد کرنا چاہتی ہے تو اسے انرجی بلز پر عائد گرین لیویز اور ٹیکس ختم کر دینے چاہیئیں۔
