وزیر داخلہ سندھ ضیاء الحسن لنجار کا کہنا ہے کہ میر رضا علی کیس کی شفاف تحقیقات کیلئے جوڈیشل کمیشن بنانے کا فیصلہ کیا ہے، جوڈیشل کمیشن نئی تحقیقاتی ٹیم کے ساتھ تعاون اور نگرانی کرے گا۔
کراچی میں میڈیا سے گفتگو کرتے ہوئے وزیر داخلہ سندھ نے کہا کہ چیف جسٹس سندھ ہائیکورٹ کو جوڈیشل کمیشن کیلئے خط کل ارسال کیا جائے گا، جوڈیشل کمیشن نئی تحقیقاتی ٹیم کے ساتھ تعاون اور نگرانی کرے گا۔
وزیر داخلہ سندھ نے کہا کہ حکومت چاہتی ہے کیس اپنے منطقی انجام تک پہنچے، والدین اعتماد کریں، فیملی جس پولیس افسر پر اعتماد کرے، اسے بھی تحقیقات میں شامل کیا جا سکتا ہے، چھوٹا سا شواہد بھی بڑے کیس کے حل میں اہم کردار ادا کر سکتا ہے۔
ضیا لنجار نے کہا کہ میر رضا کیس میں آنے والی دو میڈیکل رپورٹس کا جائزہ جوڈیشل کمیشن لے گا، متضاد رپورٹس کے معاملے کا فیصلہ کمیشن یا عدالت پر چھوڑیں گے، ابتدائی کرائم سین کو مطلوبہ انداز میں محفوظ نہیں کیا گیا، جتنا معاملہ زیر بحث آئے گا اتنا تنازع بڑھے گا، فیصلہ جوڈیشل کمیشن کرے۔
صوبائی وزیر داخلہ نے کہا کہ حکومت اس معاملے میں غیر جانبدار رہتے ہوئے حقائق سامنے لانا چاہتی ہے، کسی بھی کیس میں ایک فیصد بھی شک ہو تو تحقیقات سو فیصد ہونی چاہیئں، تحقیقات کا رُخ وقت کے ساتھ تبدیل ہو سکتا ہے، انویسٹیگیشن ختم نہیں ہوتی، آئی جی یا کسی افسر کی رائے حتمی نہیں، تحقیقات جاری ہیں۔
