پاک امریکا اقتصادی تعاون بڑھانے پر اتفاق، سرمایہ کاری اور برآمدات پر زور

واشنگٹن میں وفاقی وزیرِ خزانہ محمد اورنگزیب نے امریکی وزیرِ خزانہ اسکاٹ بیسنٹ سے ملاقات کی جس میں پاک، امریکا اقتصادی تعاون مزید مضبوط بنانے کے عزم کا اعادہ کیا گیا۔

وزارتِ خزانہ کے مطابق امریکی ہم منصب سے ملاقات میں محمد اورنگزیب نے پاکستان کی برآمدات پر مبنی پائیدار ترقی کی حکمتِ عملی پر روشنی ڈالی اور علاقائی جغرافیائی و سیاسی صورتِ حال کے ملکی معیشت پر ممکنہ اثرات سے آگاہ کیا۔

وزیرِ خزانہ نے پاکستان کی ’روڈ ٹو مارکیٹ‘ حکمتِ عملی کے لیے امریکا سے مزید تعاون کی درخواست کی جس میں بین الاقوامی سرمایہ جاتی منڈیوں تک بہتر رسائی، زرِمبادلہ کے ذخائر میں اضافہ اور پاکستان کی خودمختار کریڈٹ ریٹنگ بہتر بنانے میں تعاون شامل ہے۔

ملاقات میں دونوں ممالک نے پاکستان میں امریکی سرمایہ کاری کے فروغ اور مشترکہ اسٹریٹجک منصوبوں کو آگے بڑھانے پر بھی اتفاق کیا۔