ماہرِ امراضِ معدہ کا کہنا ہے کہ ہر کھانے کے بعد سونف کھانے کی عادت نظامِ ہاضمہ کو بہتر بنانے، پیٹ کی گیس کم کرنے اور آنتوں کی مجموعی صحت کو بہتر رکھنے میں مددگار ثابت ہوتی ہے۔
غذائی ماہرین کے مطابق سونف صدیوں سے روایتی گھریلو نسخوں کا حصہ رہی ہے اور جدید طبی نقطۂ نظر سے بھی اس کے فوائد ثابت ہو رہے ہیں۔
ہاضمہ بہتر بنانے میں مدد
سونف میں قدرتی اجزاء موجود ہوتے ہیں جو مرغن غذاؤں پر مبنی کھانے کے بعد گیس اور اپھارہ کم کرتے ہیں، اس میں موجود فائبر اور سوزش کم کرنے والے مرکبات بدہضمی، قبض اور پیٹ کے مسائل میں فائدہ دیتے ہیں۔
سانس کی بدبو سے نجات
سونف چبانے سے منہ میں بدبو پیدا کرنے والے جراثیم کم ہوتے ہیں اور لعاب بننے کا عمل تیز ہوتا ہے جس سے سانس خوش گوار رہتی ہے۔
پیٹ کو سکون پہنچاتی ہے
ماہرین برائے امراضِ معدہ کے مطابق سونف میں ہلکی اینٹھن کم کرنے والی خصوصیات بھی موجود ہوتی ہیں جو معدے کے درد اور آنتوں کی تکلیف میں کمی لاتی ہیں، سونف کا استعمال گیس کے اخراج کو آسان بناتا ہے اور ہاضمے کے عمل کو تیز کرتا ہے۔
غذائی ماہرین مشورہ دیتے ہیں کہ بہتر ہاضمے کے لیے ہر کھانے کے بعد تقریباً 1 چمچ سونف چبانا مفید ثابت ہو سکتا ہے۔
نوٹ: یہ مضمون قارئین کی معلومات کے لیے شائع کیا گیا ہے، صحت سے متعلق امور میں اپنے معالج کے مشورے پر عمل کریں۔
