بورڈ آف انویسٹمنٹ کے ایڈوائزر سید فیروز عالم شاہ نے کہا ہے کہ ایران اور امریکہ کے درمیان کشیدگی کے خاتمے اور جنگ بندی میں پاکستان کے مثبت اور مؤثر کردار نے ملک کے لیے معاشی ترقی کے نئے دروازے کھول دیے ہیں۔
جنگ سے خصوصی گفتگو کرتے ہوئے انہوں نے وزیر اعظم شہباز شریف اور فیلڈ مارشل سید عاصم منیر کی قیادت، سفارتی بصیرت اور بروقت حکمت عملی کو زبردست خراجِ تحسین پیش کیا۔
سید فیروز عالم شاہ نے کہا کہ پاکستان کی امن کوششوں کو دنیا بھر میں سراہا جا رہا ہے، جس کے نتیجے میں بیرونِ ملک مقیم پاکستانی سرمایہ کاروں کا اعتماد بحال ہو رہا ہے۔
انہوں نے کہا کہ اب بڑی تعداد میں پاکستانی اپنی سرمایہ کاری بیرونِ ملک رکھنے کے بجائے پاکستان میں لانے کو ترجیح دیں گے، جس سے صنعتی، تجارتی اور معاشی سرگرمیوں میں نمایاں تیزی آ سکتی ہے۔
انہوں نے خاص طور پر کہا کہ جاپان سے بڑی سرمایہ کاری پاکستان آنے کی امید ہے، خصوصاً آٹو موبائل، ٹیکنالوجی، صنعتی تعاون اور جدید انفرااسٹرکچر کے منصوبوں میں مثبت پیش رفت متوقع ہے۔ ان کے مطابق پاکستان اور جاپان کے درمیان بڑھتے ہوئے اقتصادی روابط اس عمل کو مزید مضبوط بنائیں گے۔
سید فیروز عالم شاہ نے مزید کہا کہ سعودی عرب کی جانب سے آئل ریفائنری کے شعبے میں 10 ارب ڈالر تک سرمایہ کاری متوقع ہے، جو پاکستان کے توانائی کے شعبے، روزگار، صنعتی پیداوار اور برآمدات میں نمایاں اضافہ کر سکتی ہے۔
انہوں نے اس امید کا اظہار کیا کہ وزیر اعظم شہباز شریف اور فیلڈ مارشل آصف منیر کی قیادت میں پاکستان کی عالمی ساکھ مزید بہتر ہوگی اور آنے والے ایام قوم کے لیے معاشی استحکام، سرمایہ کاری اور ترقی کے بہترین ثابت ہوں گے۔
