سابق وفاقی وزیر ڈاکٹر ظفر مرزا نے ملک میں ایچ آئی وی کے بڑھتے ہوئے کیسز پر شدید تشویش کا اظہار کرتے ہوئے کہا ہے کہ ایچ آئی وی ملک میں سنگین صورتحال اختیار کر رہا ہے۔
اسلام آباد میں نیوز کانفرنس کرتے ہوئے اُنہوں نے کہا کہ آلودہ سرنجز کا دوبارہ استعمال اور خون کی منتقلی سے قبل مناسب اسکریننگ نہ ہونا اس مرض کے پھیلاؤ کی بڑی وجوہات ہیں۔
ڈاکٹر ظفر مرزا کے مطابق بچوں میں ایچ آئی وی کے کیسز میں اضافہ خاص طور پر خطرناک رجحان ہے جبکہ مجموعی طور پر یہ بیماری ملک میں سنگین صورتحال اختیار کر رہی ہے۔
اُنہوں نے کہا کہ ایچ آئی وی سمیت دیگر امراض کا بڑھنا صحت کے نظام کی کمزوری کو ظاہر کرتا ہے۔
اِن کا کہنا تھا کہ خون کی منتقلی سے پہلے اس کی مکمل اسکریننگ ناگزیر ہے تاکہ مہلک بیماریوں سے بچاؤ ممکن بنایا جا سکے، ہپیٹائٹس سی کے حوالے سے اُنہوں نے بتایا کہ اس مسئلے میں پاکستان کے ساتھ بھارت اور چین بھی متاثرہ ممالک میں شامل ہیں۔
ڈاکٹر ظفر مرزا نے یہ بھی واضح کیا کہ پاکستان میں اب تک ہیلتھ سیکٹر کو مکمل طور پر پرائیویٹائز نہیں کیا گیا اور صحت کے نظام کو بہتر بنانے کے لیے جامع اقدامات کی ضرورت ہے۔
