کتے کے کاٹنے کے کتنے گھنٹوں میں ریبیز ویکسین ضروری ہے؟

کتے کے کاٹنے یا نوچنے سے لاحق ہونے والی ریبیز ایک خطرناک اور جان لیوا بیماری بن سکتی ہے، اس لیے علاج میں تاخیر نہیں کرنی چاہیے۔

ماہرین کے مطابق ریبیز وائرس عموماً متاثرہ جانور کے تھوک کے ذریعے کاٹنے، خراش یا زخمی جلد پر تھوک لگنے سے انسان میں منتقل ہوتا ہے۔

ماہرین کا کہنا ہے کہ کتے کے کاٹنے کے بعد ریبیز سے بچاؤ کی ویکسین جتنی جَلد ممکن ہو لگوانی چاہیے، بہتر ہے کہ پہلے 24 گھنٹوں کے اندر طبی امداد حاصل کی جائے تاہم اگر 24 گھنٹے گزر چکے ہوں تو بھی ویکسین لگوانے میں مزید تاخیر نہیں کرنی چاہیے۔

ریبیز کی علامات ظاہر ہونے میں کئی ہفتے یا اس سے بھی زیادہ وقت لگ سکتا ہے۔

علامات میں بخار، الجھن، بے چینی، اشتعال، ہذیان اور فالج جیسی علامات ظاہر ہونے کے بعد بیماری تقریباً ہمیشہ مہلک ثابت ہوتی ہے، اس لیے علامات کا انتظار کرنا خطرناک ہے۔

ویکسین کی خوراکیں

ریبیز سے بچاؤ کی ویکسین عموماً پہلے 24 گھنٹوں میں یا 3، 7، 14 اور 28 ویں دن دی جاتی ہے تاہم خوراکوں کی تعداد اور شیڈول مریض کی صورتِ حال اور ڈاکٹر کی ہدایت کے مطابق مختلف ہو سکتا ہے۔

کتے کے کاٹنے کے فوراً بعد کیا کریں؟

زخم کو فوراً صابن اور بہتے پانی سے کم از کم 15 منٹ تک اچھی طرح دھوئیں، اس کے بعد مناسب جراثیم کش دوا مثلاً آئیوڈین محلول لگایا جا سکتا ہے۔

اگر خون بہہ رہا ہو تو صاف کپڑے سے دباؤ ڈال کر خون روکنے کی کوشش کریں، زخم کو خود سے مضبوطی سے بند یا ٹانکوں سے سیل نہ کریں، ٹانکے لگانے کا فیصلہ ڈاکٹر کی موجودگی میں کیا جائے۔

زخم دھونے کے بعد فوری طور پر قریبی اسپتال یا طبی مرکز جائیں تاکہ ڈاکٹر ریبیز سے بچاؤ کے علاج کا فیصلہ کر سکے۔

طبی ماہرین کا کہنا ہے کہ ریبیز کی علامات کا انتظار کرنا جان لیوا ثابت ہو سکتا ہے، اس لیے کتے کے کاٹنے یا مشتبہ جانور کے نوچنے کے بعد علاج میں تاخیر نہیں کرنی چاہیے۔