ترک ڈرامہ سیریل کورولوش عثمان میں میخائل کوسس کا کردار نبھانے والے ترکیہ کے معروف اداکار سرحات مصطفیٰ کیلیچ گھر میں مردہ حالت میں پائے گئے۔
استنبول کے ضلع Kağıthane میں واقع اپارٹمنٹ میں اداکار کو 5 ستمبر کو ان کی دوست نے مردہ حالت میں پایا۔ 51 سالہ اداکار کو گھر کے ایک کمرے کی کرسی میں بے حس و حرکت بیٹھے ہوئے پایا گیا۔
اوزلم ای 3 ستمبر سے سرحات کیلیچ سے رابطہ کرنے کی کوشش کر رہی تھیں تاہم ایسا نہ ہونے پر وہ انہیں دیکھنے کے لیے وہاں پہنچی تھیں۔
گھر کے اندر انہوں نے دیکھا کہ اداکار سانس نہیں لے رہے تو مدد کے لیے انہوں نے ایمرجنسی سروس سے رابطہ کیا جس کے بعد طبی ٹیموں نے وہاں پہنچ کر تصدیق کی کہ اداکار کا انتقال ہو چکا ہے۔
اوزلم ای نے پولیس کو بتایا کہ ان کے بوائے فرینڈ کو لمفک کینسر کا سامنا تھا۔
اداکار کی پراسرار موت کے بعد پولیس نے تحقیقات شروع کر دی ہیں، ابتدائی معائنے میں کسی جسمانی حملے کے آثار یا کھلے زخم دریافت نہیں ہوئے، حکام کی جانب سے میت کو پوسٹ مارٹم کے لیے اسپتال منتقل کردیا گیا ہے۔
اداکار 1975 میں پیدا ہوئے تھے اور وہ ترکیہ کے معروف فلمی و ٹی وی اداکار تھے۔