بھارتی ریپر، گلوکار، گیت نگار، میوزک اور مووی پروڈیوسر ادیتیا پراتیک سنگھ المعروف بادشاہ کی اہلیہ ایشا ریکھی نے شوہر سے علیحدگی کے بعد کہا کہ وہ خوفزدہ تھیں اور خود کو شوہر کی طاقت کے سامنے مغلوب محسوس کرتی تھیں، تاہم انھوں نے یہ انسٹاگرام پوسٹ سے ڈیلیٹ کر دی۔
بتایا جاتا ہے کہ 33 سالہ اداکارہ ایشا ریکھی اور 40 سالہ بادشاہ نے ایک دوسرے سے علیحدگی اختیار کرنے کا فیصلہ کیا ہے۔ دونوں کی علیحدگی کی خبر نے ان کے مداحوں کو حیران کر دیا ہے۔ خاص طور پر اس لیے کہ ان کی شادی کا اعلان خود ایشا نے انسٹاگرام پر صرف پانچ ماہ قبل کیا تھا۔
اب دونوں نے سوشل میڈیا پلیٹ فارم انسٹاگرام پر ایک دوسرے کو فالو کرنا بھی چھوڑ دیا ہے۔ ایشا نے بادشاہ سے متعلق اپنی تمام پوسٹس بھی ڈیلیٹ کر دی ہیں۔ ایشا نے جولائی میں ایک انسٹاگرام پوسٹ کے ذریعے اپنے رشتے میں مشکلات کے اشارے دینا شروع کیے تھے۔
اس موقع پر انہوں نے لکھا تھا کہ کچھ جھگڑے ایسے ہوتے ہیں جن کے کوئی ظاہری زخم نہیں ہوتے۔ ایک طویل عرصے تک میں خاموش رہی کیونکہ میں خوفزدہ تھی۔ مجھے اپنے شوہر کے اثر و رسوخ، طاقت اور وسائل کا دباؤ محسوس ہوتا تھا۔
انھوں نے مزید لکھا تھا کہ میں نے خود کو یہ یقین دلا لیا تھا کہ خاموش رہنا ہی سب سے محفوظ راستہ ہے۔ خاموشی کبھی رضامندی نہیں تھی، یہ صرف زندہ رہنے کا ایک طریقہ تھا۔ آج میں خوف کے بجائے ہمت کا انتخاب کر رہی ہوں۔ شاید میں ابھی پوری کہانی بتانے کے لیے تیار نہیں ہوں، لیکن آخرکار میں یہ دکھاوا کرنا چھوڑنے کے لیے تیار ہوں کہ سب کچھ ٹھیک تھا۔
تاہم اب یہ پوسٹ ایشا کے انسٹاگرام فیڈ پر نظر نہیں آ رہی۔ ایک اور پوسٹ میں ایشا نے ایک کولاج شیئر کیا تھا، جس کا آغاز بادشاہ اور ایشا کی ایک خوشگوار ویڈیو کلپ سے ہوتا تھا، اس کے بعد ان کی شادی کی تصاویر اور ایک گروپ فوٹو شامل تھی۔ کولاج کے اختتام پر ایک ایسی تصویر تھی جس میں ایشا رو رہی تھیں جبکہ بادشاہ انہیں گلے لگائے ہوئے تھے۔
اس پوسٹ کے کیپشن میں انہوں نے لکھا تھا: ہر طوفان ایک سبق ہے۔ ہر دعا امید ہے۔ ساتھ ہی انہوں نے ہاتھ جوڑنے اور ٹوٹے ہوئے دل والے ایموجیز بھی شیئر کیے تھے۔