آئرلینڈ کی کاؤنٹی کِلڈیر میں ایم نائن موٹروے پر خوفناک ٹریفک حادثے میں پانچ نوعمر لڑکے ہلاک جبکہ چار افراد شدید زخمی ہو گئے۔ حادثے مقام پر فارنزک تحقیقات کی گئیں۔
آئرش پولیس کے مطابق حادثہ اتوار کی صبح تقریباً تین بجے اَتھی کے قریب جنکشن تین اور چار کے درمیان اس وقت پیش آیا جب دو گاڑیاں آمنے سامنے سے ٹکرا گئیں، جن میں سے ایک موٹروے پر غلط سمت میں سفر کر رہی تھی۔
پولیس کے مطابق ہلاک ہونے والے پانچوں نوعمر لڑکے ایک ہی گاڑی میں سوار تھے۔ ان کی لاشیں پوسٹ مارٹم کے لیے ناس جنرل اسپتال منتقل کر دی گئی ہیں۔
دوسری گاڑی میں سوار چار افراد بھی شدید زخمی ہوئے، جن میں تین خواتین اور ایک بچہ شامل ہیں، دو خواتین کی حالت تشویشناک بتائی گئی ہے۔
گارڈا کمشنر جسٹن کیلی نے موٹر وے پر غلط سمت میں گاڑی چلانے کو انتہائی خطرناک اور غیر ذمہ دارانہ قرار دیتے ہوئے کہا کہ بعض افراد سماجی ذرائع ابلاغ پر پسندیدگیاں حاصل کرنے کے لیے بھی ایسی خطرناک حرکت کرتے ہیں۔
حادثے کے بعد ایم نائن موٹروے کا جنکشن تین سے چار تک دونوں سمتوں میں بند کر دیا گیا جبکہ جائے حادثہ پر فارنزک تحقیقات کی گئیں۔