پاکستانی اداکارہ زارا نور عباس نے اپنی والدہ اور سینئر اداکارہ اسما عباس کے ساتھ خوبصورت ڈانس کی ویڈیو شیئر کر کے مداحوں کے دل جیت لیے۔
سوشل میڈیا پر وائرل ہونے والی ویڈیو میں ماں بیٹی کی جوڑی روایتی لباس میں ایک ساتھ ڈانس کرتی دکھائی دے رہی ہے۔
زارا نور عباس نے ویڈیو کے ساتھ اپنی والدہ کے ساتھ خصوصی تعلق اور نسل در نسل منتقل ہونے والی محبت کے بارے میں ایک جذباتی پیغام بھی لکھا، جس نے ویڈیو کو مزید خاص بنا دیا۔
زارا نور عباس نے انسٹاگرام پر ویڈیو شیئر کی، جس میں وہ اسما عباس کے ساتھ معروف موسیقار اے آر رحمٰن سمیت دیگر فنکاروں کے گانے پر ڈانس کرتی نظر آئیں۔
دونوں نے ہم رنگ روایتی لباس زیب تن کر رکھا تھا اور ڈانس کے دوران ایک دوسرے کی کمپنی سے لطف اندوز ہوتی دکھائی دیں۔
زارا کے مطابق یہ ویڈیو محض اپنی والدہ کے ساتھ ڈانس کرنے کے بارے میں نہیں بلکہ ان کے درمیان موجود اس خوبصورت رشتے کی عکاسی بھی ہے جس میں بعض چیزیں سکھائے بغیر ہی ایک نسل سے دوسری نسل تک منتقل ہو جاتی ہیں۔
اداکارہ نے بتایا کہ میں نے اپنی والدہ سے ڈانس کے تمام اسٹیپس باقاعدہ طور پر نہیں سیکھے، لیکن اس کے باوجود جسم والدہ کے انداز اور تال کو خود بخود محسوس کرتا ہے۔
زارا نے لکھا کہ برسوں کے دوران میں نے اپنی والدہ سے بہت سی چھوٹی چھوٹی چیزیں غیر محسوس طریقے سے سیکھی ہیں، جس کی وجہ سے یہ ڈانس ہمارے درمیان مضبوط رشتے کی عکاسی کرتا محسوس ہوتا ہے۔
انہوں نے ایک دلچسپ اور پیارا واقعہ بھی شیئر کیا ہے کہ جب میں ڈانس کے دوران کوئی اسٹیپ غلط کرتی ہوں تو والدہ پیار سے کندھے پر ہاتھ رکھتی ہیں، مجھے اپنے قریب کرتی ہیں اور کہتی ہیں یہاں میں تمہیں دکھاتی ہوں۔
زارا نے کہا کہ والدہ آج بھی میری زندگی کے چھوٹے چھوٹے معاملات میں اسی محبت اور شفقت کے ساتھ رہنمائی کرتی ہیں۔
اداکارہ نے اپنے کیپشن میں لکھا کہ کچھ چیزیں سکھائی جاتی ہیں، کچھ چیزیں نسل در نسل منتقل ہوتی ہیں، یہ والدہ کے ساتھ شیئر کیے جانے والے خوبصورت ترین رشتوں میں سے ایک ہے۔
زارا کی پوسٹ پر مداحوں اور شوبز شخصیات کی جانب سے بھی بھرپور محبت کا اظہار کیا گیا ہے۔
اداکارہ حرا مانی نے دل والے ایموجیز کے ذریعے ردِعمل دیا، جبکہ حرا خان نے لکھا ہے اُف ماں صدقے! حنا آفریدی سمیت دیگر صارفین نے بھی محبت بھرے تبصرے کیے ہیں۔
