پشاور ہائی کورٹ نے 2 درخواست گزار افغان صحافیوں کو ڈی پورٹ کرنے سے روک دیا۔
عدالت نے فیصلے میں کہا ہے کہ وفاقی حکومت 2 ماہ میں درخواست گزاروں کے کیس کا تعین کرے۔
درخواست گزار سید احسان اللّٰہ صالحی اور سید منیر احمد افغان صحافی ہیں۔
پشاور ہائی کورٹ کا کہنا ہے کہ درخواست گزار قانونی ویزے پر پاکستان آئے ہیں اور اس وقت پاکستان میں مقیم ہیں، درخواست گزاروں کے مطابق انہوں نے فرانس میں آباد کاری کے لیے درخواست دی ہے۔
فیصلے میں کہا گیا ہے کہ درخواست گزاروں کے مطابق ان کی درخواستیں فی الحال زیرِ غور ہیں، فرانسیسی سفارت خانے نے درخواست گزاروں کے کیسز میں پہلے ہی توثیق دے دی ہے۔
عدالت کا کہنا ہے کہ وکیل کے مطابق درخواست گزاروں کی گرفتاری اور ملک بدر ہونے کا خدشہ ہے، درخواست گزار ملک بدر ہونے کے ڈر سے آزادانہ نقل و حرکت نہیں کر سکتے، وفاقی حکومت 60 دن میں فیصلہ دینے سے قاصر رہتی ہے تو وزارتِ داخلہ درخواست گزاروں کو عارضی اجازت دے۔
