بالی ووڈ اداکارہ پریتی زنٹا نے طویل عرصے بعد فلمی دنیا میں واپسی سے قبل انکشاف کیا ہے کہ وہ گزشتہ 8 برس تک فلموں سے اس لیے دور رہیں کیونکہ ان کی پہلی ترجیح اپنے خاندان اور بچوں کی پرورش تھی۔
پریتی زنٹا جلد ہدایت کار راج کمار سنتوشی کی فلم بٹوارہ 1947 کے ذریعے بڑے پردے پر واپسی کر رہی ہیں، فلم کی ریلیز سے قبل میڈیا سے گفتگو کرتے ہوئے انہوں نے اپنے 8 سالہ وقفے اور دوبارہ اداکاری کے تجربے پر کھل کر بات کی۔
اداکارہ سے پوچھا گیا کہ کیا اتنے طویل وقفے کے بعد کیمرے کے سامنے آنا سائیکل چلانے کی طرح آسان محسوس ہوا؟ اس پر پریتی زنٹا نے اعتراف کیا کہ ابتدا میں کافی گھبراہٹ کا شکار تھی۔
انہوں نے بتایا کہ ہدایت کار راج کمار سنتوشی نے شوٹنگ کے پہلے ہی روز فلم کا سب سے مشکل منظر میرے سپرد کر دیا۔
پریتی زنٹا نے کہا کہ ساتھی اداکار سنی دیول نے اس مشکل موقع پر میرا حوصلہ بڑھایا۔
انہوں نے ہنستے ہوئے کہا کہ پہلے ہی دن مجھے فلم کا سب سے مشکل سین دے دیا گیا، میں سنی دیول کی طرف دیکھ رہی تھی کہ اب کیا کروں، انہوں نے بہت حوصلہ دیا اور کہا کہ فکر نہ کرو، ڈائریکٹر کو ری ٹیک لینے کا شوق ہے، سب ٹھیک ہو جائے گا، یہاں تک کہ انہوں نے مجھ سے پوچھا کہ کیا میں کچھ کھانا چاہتی ہوں۔
اداکارہ کے مطابق پوری رات شوٹنگ کرنے اور مشکل منظر مکمل کرنے کے بعد میرا اعتماد بحال ہوگیا اور دوبارہ اداکاری کرنا آسان محسوس ہونے لگا۔
انہوں نے مزید کہا کہ فلموں سے دور رہنے کے باوجود مجھے کبھی بھی دوبارہ فلمی دنیا میں واپس آنے کی کمی محسوس نہیں ہوئی کیونکہ میں اپنی خاندانی زندگی میں خوش تھی اور اپنے بچوں کی پرورش کو سب سے زیادہ اہمیت دیتی تھی۔
واضح رہے کہ پریتی زنٹا کی آخری فلم بھیا جی سپر ہٹ 2018 میں ریلیز ہوئی تھی، جس میں ان کے ساتھ سنی دیول بھی مرکزی کردار میں نظر آئے تھے۔
فلم بٹوارہ 1947 میں شبانہ اعظمی، سنی دیول، کرن دیول، علی فضل، ابھیمنیو سنگھ، خوشی ہجارے اور کنیکا کپور سمیت کئی معروف فنکار اہم کردار ادا کر رہے ہیں۔