بھارتی ریاست ہریانہ میں ایک نجی اسکول کی 29 سالہ ٹیچر سندھیا کو ایک نقاب پوش شخص نے اسکول کے اندر بے دردی سے قتل کر دیا۔
بھارتی میڈیا کے مطابق واقعہ آج صبح ایک نجی اسکول میں پیش آیا جہاں ملزم اسکول پہنچا اور ٹیچر کو نام لے کر بلایا، جیسے ہی ٹیچر اس سے ملنے باہر آئی تو ملزم نے محض 30 سیکنڈ میں چہرے گردن اور سینے پر 34 چاقو کے وار کر دیے۔
بھارتی میڈیا کے مطابق واقعے کی سی سی ٹی وی فوٹیج میں ملزم کو اسکول کی لابی میں انتظار کرتے اور پھر ٹیچر کو باہر بلا کر حملہ کرتے دیکھا گیا ہے۔
اسکول کی انتظامیہ کے مطابق ٹیچر کی چیخیں سن کر جب مدد کی کوشش کی گئی تو ملزم نے انتظامیہ کو بھی چاقو سے دھمکایا اور زمین پر گری ٹیچر پر مزید وار کیے اور بعد ازاں بغیر نمبر پلیٹ کی موٹر سائیکل پر فرار ہو گیا۔
زخمی ٹیچر کو فوری طور پر اسپتال منتقل کیا گیا تاہم ڈاکٹرز نے انہیں مردہ قرار دے دیا۔
بھارتی میڈیا کے مطابق پولیس نے 21 سالہ ملزم امیت کو گرفتار کر لیا ہے جس نے دورانِ تفتیش قتل کا اعتراف بھی کیا ہے۔
ابتدائی تحقیقات کے مطابق ملزم گزشتہ 2 برس سے ٹیچر کا تعاقب کر رہا تھا، بار بار دوستی اور رابطے کا مطالبہ کرتا تھا۔
رپورٹس کے مطابق مقتولہ سندھیا نے دوستی سے انکار اور چند روز قبل ہی ملزم کے خلاف چھیڑ چھاڑ کا مقدمہ درج کروایا تھا۔
پولیس کا کہنا ہے کہ ملزم نے اسی مقدمے کا بدلہ لینے کے لیے ٹیچر کو قتل کیا ہے۔
