وزیرِاعظم کے مشیر برائے سیاسی امور رانا ثناء اللّٰہ نے کہا ہے کہ مسلم لیگ ن نے قانون ساز اسمبلی کی 45 میں سے 23 نشستیں جیت کر حکومت سازی کے لیے سادہ اکثریت حاصل کر لی۔
رانا ثناء اللّٰہ نے کہا ہے کہ عوام نے نواز شریف کے وژن پر اعتماد کا اظہار کیا، آزاد کشمیر میں جمہوری مینڈیٹ کی بنیاد پر حکومت قائم کی جائے گی۔
انہوں نے کہا کہ آزاد جموں و کشمیر کے انتخابات کا دوسرا مرحلہ مکمل ہو چکا جس میں 20 نشستوں پر پولنگ ہوئی جبکہ ایل اے 27 میں خراب موسم کے باعث انتخابات ملتوی کر دیے گئے۔
رانا ثناء نے بتایا کہ مظفرآباد کی 9 میں سے 7 نشستوں پر انتخابی عمل مکمل ہوا جن میں سے 4 نشستوں پر مسلم لیگ ن کامیاب رہی، مجموعی طور پر مسلم لیگ ن نے 13 نشستیں حاصل کیں جبکہ دوسرے مرحلے میں پیپلز پارٹی 3 نشستیں جیت سکی۔
ان کا کہنا ہے کہ مجموعی طور پر 12 مہاجر نشستوں میں سے 10 پر بھی مسلم لیگ ن نے کامیابی حاصل کی۔
رانا ثناء اللّٰہ کا کہنا ہے کہ آزاد کشمیر میں شفاف انتخابات ہوئے اور عوام کو پورا دن آزادانہ حقِ رائے دہی استعمال کرنے کا موقع ملا، 10 تاریخ کو پارلیمانی پارٹیوں کا اجلاس بھی بلایا جائے گا۔
انہوں نے کہا کہ پولنگ شروع ہوتے ہی پیپلز پارٹی نے دھاندلی کا شور مچانا شروع کر دیا تھا، اس سے پہلے بھی 13 حلقوں میں دھاندلی کا دعویٰ کیا گیا، پھر یہ تعداد 4 اور بعد ازاں صرف 2 نشستوں تک محدود ہو گئی، مسلم لیگ ن نے پولنگ اسٹیشنز کا فرانزک آڈٹ کروانے کی بھی پیشکش کی۔
رانا ثناء اللّٰہ نے کہا کہ پیپلز پارٹی کے رہنما ایکشن کمیٹی کے ساتھ مل کر مظفر آباد میں احتجاج کرتے رہے جس کے دوران 1 شخص جاں بحق ہوا اور شہر میں خوف و ہراس کی فضا پیدا ہوئی۔
ان کا کہنا ہے کہ دھاندلی کا پروپیگنڈا کیا گیا جبکہ چوہدری لطیف اکبر کے حلقے کو متاثر کرنے کے لیے بھی بھرپور کوششیں کی گئیں اور سندھ پولیس کی ڈیوٹی لگوانے کا مطالبہ کیا گیا۔
رانا ثناء اللّٰہ نے کہا کہ آزاد کشمیر کی نئی حکومت عوامی مسائل کے حل کو اپنی اولین ترجیح بنائے گی۔
