وزیرِ اعظم شہباز شریف کی زیرِ صدارت اجلاس میں پاکستان آئل ریفائننگ پالیسی 2023ء میں مجوزہ ترامیم کی منظوری دے دی گئی۔
کابینہ کمیٹی برائے توانائی کے اجلاس میں وفاقی وزراء احد چیمہ، محمد اورنگزیب، علی پرویز ملک، احسن اقبال اور وفاقی سیکریٹریز بھی شریک ہوئے۔
اجلاس کو آئل ریفائنریز کی اپ گریڈیشن، انرجی سیکٹر میں اصلاحات اور پالیسی پر عمل درآمد کی پیشرفت پر بریفنگ دی گئی۔
وزیرِ اعظم نے کہا ہے کہ آئل ریفائنریز کی اپ گریڈیشن پاکستان کے توانائی تحفظ کے جامع نظام کا ایک اہم ستون ہے، ریفائنریز درآمدی ایندھن پر انحصار کم کرنے اور ماحول دوست ایندھن کی فراہمی میں بھی معاون ثابت ہوں گی۔
انہوں نے ہدایت کی تمام اسٹیک ہولڈرز کے ساتھ قریبی رابطہ رکھتے ہوئے اصلاحاتی عمل کو تیز کیا جائے، اوگرا کی کارکردگی بہتر بنانے، مارکیٹ ضروریات پوری کرنے کے لیے اصلاحات لائی جائیں، اصلاحات سے شعبہ توانائی میں مسابقت، شفافیت اور سرمایہ کاری کو فروغ ملے گا، نئی پالیسی کے نفاذ کے بعد اس پر مؤثر اور بروقت عملدرآمد یقینی بنایا جائے، کسی بھی قسم کی غفلت یا تاخیر ہرگز برداشت نہیں کی جائے گی۔
وزیرِ اعظم شہباز شریف نے قطر، سعودی عرب اور دیگر خلیجی ممالک میں روڈ شوز منعقد کرنے کی ہدایت کرتے ہوئے کہا کہ روڈ شوز ترمیمی پاکستان آئل ریفائننگ پالیسی 2023ء کی ترویج کے لیے منعقد کیے جائیں گے۔
انہوں نے ریفائننگ پالیسی میں ترمیم سے متعلق وزیرِ پیٹرولیم اور ان کی ٹیم کو سراہا اور ملک میں پیٹرولیم مصنوعات کے اسٹریٹجک ذخائر بڑھانے کی ہدایت بھی کی۔
