ہالی ووڈ کی آسکر ایوارڈ یافتہ 52 سالہ اداکارہ ہیلری سوینک کے ہاں تیسرے بچے کی پیدائش متوقع ہے۔
ہیلری سوینک نے فوٹو اینڈ ویڈیو شیئرنگ ایپ انسٹاگرام پر ویڈیو کے ذریعے یہ خوش خبری سنا کر مداحوں کو حیران کر دیا۔
اُنہوں نے ویڈیو شیئر کرتے ہوئے کیپشن میں لکھا ہے کہ بہت سے لوگ مجھ سے پوچھ رہے تھے کہ میرا اگلا پروجیکٹ کیا ہے؟ تو میرا یہ پروجیکٹ دسمبر میں سامنے آئے گا۔
واضح رہے کہ فلم ’ملین ڈالر بے بی‘ اور ’بوائز ڈونٹ کرائی‘ میں اپنی شاندار اداکاری سے شہرت حاصل کرنے والی اداکارہ ہیلری سوینک نے 2018ء میں کاروباری شخصیت فلپ شنائیڈر سے شادی کی تھی اور اس جوڑی کے ہاں اپریل 2023ء میں جڑواں بچوں، بیٹی آیا اور بیٹے اوہم کی پیدائش ہوئی تھی، اس وقت ان کی عمر 48 سال تھی۔
ہیلری سوینک ماضی میں بھی بڑی عمر میں ماں بننے کے تجربے پر بات کر چکی ہیں۔
اداکارہ کا کہنا تھا کہ اداکاری کے اپنے خواب کو پورا کرنے کے بعد مجھے ماں بننے کے اس مرحلے پر اپنے بچوں کو زیادہ وقت اور توجہ دینے کا موقع ملا۔
طبی ماہرین کے مطابق 52 سال کی عمر میں حاملہ ہونا غیر معمولی ہے اور اس عمر میں حمل کے دوران ماں اور بچے دونوں کی صحت کے حوالے سے خصوصی نگرانی ضروری ہو سکتی ہے۔