ایسوسی ایشن آف پاکستانی فزیشنز اینڈ سرجنز یو کے (اے پی پی ایس یو کے) اور این ڈی ایف اے کی ٹیموں کے درمیان آزادی کرکٹ کپ کے سلسلے میں ایک دلچسپ کرکٹ مقابلے کا انعقاد کیا گیا۔
تقریب کا مقصد کھیلوں کے ذریعے پاکستانی کمیونٹی میں باہمی روابط، اتحاد اور دوستانہ جذبے کو فروغ دینا تھا۔
کرکٹ مقابلے میں پاکستانی نژاد ماہرینِ طب اور دیگر معزز شخصیات نے بھرپور شرکت کی، اس موقع پر ڈاکٹر غلام عباس، ڈاکٹر عرفان رشید، ڈاکٹر کاشف چوہان، ڈاکٹر عبدالحفیظ، ڈاکٹر ایاز اصغر، ڈاکٹر فیصل رانا، ڈاکٹر توصیف، ڈاکٹر طلحہ طارق اور دیگر نے شرکت کی۔
شرکاء نے کھیلوں کی سرگرمیوں کو صحت مند معاشرے کے فروغ اور کمیونٹی کے افراد کو ایک دوسرے کے قریب لانے کا مؤثر ذریعہ قرار دیا، آزادی کرکٹ کپ کے دوران کھلاڑیوں نے کھیل کے میدان میں بہترین اسپورٹس مین اسپرٹ کا مظاہرہ کیا، جبکہ حاضرین نے بھی مقابلے سے بھرپور لطف اٹھایا۔
منتظمین کا کہنا تھا کہ اس طرح کی سرگرمیوں کا مقصد ناصرف پاکستانی کمیونٹی میں کھیلوں کو فروغ دینا ہے بلکہ برطانیہ میں مقیم پاکستانی ڈاکٹرز، پروفیشنلز اور دیگر شعبہ ہائے زندگی سے تعلق رکھنے والے افراد کے درمیان باہمی رابطوں کو بھی مضبوط بنانا ہے۔
