بھارتی اداکارہ رشمیکا مندانا اپنی آنے والی فلم کے سیٹ پر ایک رقص کا منظر شوٹ کرواتے ہوئے گر کر شدید زخمی ہو گئیں۔
بھارتی میڈیا کی رپورٹ کے مطابق جسمانی طور پر ایک مشکل ڈانس اور ایکشن سین کی شوٹنگ کے دوران گرنے کی وجہ سے اداکارہ کے کولہے کا پٹھا شدید مثاثر ہوا ہے۔
یہ واقعہ رانابالی یا میسا کے سیٹ پر پیش آیا۔ حادثے کے بعد شوٹنگ فوری طور پر روک دی گئی اور عملے کے ارکان نے اداکارہ کو طبی امداد کے لیے قریب کے اسپتال پہنچایا۔
رپورٹس میں بتایا گیا ہے کہ اس چوٹ کے باعث انہیں کام پر واپس آنے سے پہلے کئی ہفتوں کے آرام و صحتیابی کے عمل سے گزرنا پڑے گا۔ چوٹ کی شدت ڈاکٹروں کے لیے بھی حیران کن تھی، اُن کا کہنا تھا کہ پٹھوں کو اس نوعیت کا نقصان عام طور پر ان پروفیشنل کھلاڑیوں میں دیکھا جاتا ہے جو سخت ترین تربیت حاصل کرتے ہیں۔
مکمل طبی معائنہ کیا جا چکا ہے اور انہیں چھ ہفتے تک مکمل آرام کا مشورہ دیا گیا ہے، جس کے بعد ایک منظم بحالی کے پروگرام پر عمل کیا جائے گا۔
رشمیکا اور ان کی ٹیم نے سیٹ پر پیش آنے والے اس حادثے سے متعلق ابھی تک کوئی رسمی بیان جاری نہیں کیا ہے۔
رشمیکا نے اداکار وجے دیوراکونڈا سے شادی کے بعد اپنی آنے والی فلم میسا کی شوٹنگ کا دوبارہ آغاز کیا تھا۔ نئے ڈائریکٹر رویندر پولے کی ہدایت کاری میں بننے والی فلم میسا کو ایک جذباتی ایکشن تھرلر فلم بتایا جا رہا ہے۔
