سڑک پر لاوارث ملنے والی بھارت کی نامور تیلگو اداکارہ پاورا شیاملا اسپتال میں دورانِ علاج چل بسیں۔ ان کی عمر 75 برس تھی۔ ان کی موت صحت کی خرابیوں کے باعث علاج کے دوران دل کا دورہ پڑنے سے ہوئی۔
اداکارہ کی موت ان کی اس حالت کے چند ہفتوں بعد ہوئی ہے جب ایک اسپتال سے علاج کے بغیر لوٹائے جانے کے بعد وہ سڑک پر لاوارث پائی گئی تھیں۔
بھارتی میڈیا کی رپورٹ کے مطابق وہ کچھ عرصے سے شدید طبی مسائل کا شکار تھیں اور حیدرآباد کے عثمانیہ اسپتال میں دورانِ علاج انتقال کر گئیں۔ ڈاکٹرز کا کہنا ہے کہ ان کا انتقال دل کا دورہ پڑنے سے ہوا۔
شیاملا تین دہائیوں سے زائد عرصے سے ٹالی ووڈ (تیلگو فلم انڈسٹری) میں معاون اداکارہ کے طور پر کام کر رہی تھیں، لیکن آخری چند سال ان کے لیے آسان نہیں رہے۔
عمر سے متعلق بیماریوں میں مبتلا ہونے، گزر بسر کے لیے جدوجہد کرنے اور ساتھ ہی بیماریوں کا شکار اپنی بیٹی کی دیکھ بھال نے ان کی زندگی کو بہت سخت بنا دیا تھا۔ مئی میں، فنڈز کی کمی کی وجہ سے انہیں ایک اسپتال سے واپس بھیج دیا گیا تھا اور پولیس کو وہ سڑک پر ملی تھیں۔
بدقسمتی سے، یہ پہلا موقع نہیں تھا جب شیاملا کو اس طرح کی مصیبت کا سامنا کرنا پڑا، کیونکہ دسمبر 2025 میں بھی اداکارہ اور ان کی بیٹی کو مبینہ طور پر اس عمارت کو چھوڑنے کے لیے کہا گیا تھا جہاں وہ رہ رہی تھیں۔
شیاملا کو فلموں میں مزاحیہ کردار ادا کرنے کے لیے جانا جاتا تھا، جیسے کہ گولی مار، کھڈگم، آندھرا والا اور وارشم۔ انہوں نے چرنجیوی، پربھاس، جونیئر این ٹی آر، الو ارجن اور دیگر نامور ستاروں کے ساتھ کام کیا۔
2019 میں ریلیز ہونے والی فلم ’ماتھو وڈالارا‘ ان کی آخری بڑی فلم تھی۔ ان کے کچھ فلمی مناظر آج بھی میمز کے طور پر بہت مقبول ہیں۔
