لاہور میں وزیراعلیٰ پنجاب مریم نواز سے معروف برطانوی نژاد پاکستانی ڈاکٹر حسنات خان نے ملاقات کی ہے۔ اس موقع پر مریم نواز نے عزم ظاہر کیا کہ وہ پنجاب کو دنیا بھر میں میڈیکل ٹورازم کا ہب بنانا چاہتی ہیں۔
ملاقات کے دوران وزیراعلیٰ نے ڈاکٹر حسنات کو ڈین جناح انسٹیٹیوٹ آف کارڈیالوجی لاہور کی ذمہ داری سنبھالنے پر مبارکباد دی ہے۔
اس ملاقات میں نوتعمیر شدہ جناح انسٹیٹیوٹ آف کارڈیالوجی سے متعلق انتظامی امور پر بھی تبادلہ خیال کیا گیا۔
وزیراعلیٰ مریم نواز نے جناح انسٹیٹیوٹ آف کارڈیالوجی کو بہترین ادارہ بنانے کے عزم کا اعادہ کیا۔
اس موقع پر وزیراعلیٰ پنجاب کا کہنا تھا کہ خوشی ہے کہ پاک دھرتی کے سپوت نے غریب ہم وطنوں کی خدمت کا راستہ چن لیا۔
انہوں نے یہ بھی کہا کہ پنجاب ہی نہیں پاکستان کے ہر فرد کو دل کے علاج کی بہترین سہولتیں فراہم کرنے کےلیے کوشاں ہیں۔
مریم نواز کا کہنا تھا کہ پنجاب کو دنیا میں میڈیکل ٹورازم کا ہب بنانا چاہتے ہیں۔
