ایرانی مرکزی بینک کے گورنر عبدالناصر ہمتی نے امریکی دعوے کو مسترد کرتے ہوئے کہا ہے کہ ایران معاشی طور پر تباہی کے مرحلے میں داخل نہیں ہوا، مرکزی بینک مارکیٹ کو مستحکم رکھنے کے لیے زرِمبادلہ مارکیٹ میں 2 ارب ڈالرز تک فراہم کرنے کو تیار ہے۔
تہران میں ایک کانفرنس سے خطاب کرتے ہوئے عبدالناصر ہمتی نے کہا کہ ایران کے واجبات کی وصولی اور زرِمبادلہ کے وسائل حاصل کرنے کا عمل جاری ہے، ملک کے پاس اندرونی ذخائر بھی موجود ہیں۔
انہوں نے امریکی صدر کو مخاطب کرتے ہوئے کہا کہ ایران کے پاس کافی زرِمبادلہ موجود ہے اور مغربی پابندیوں کے باوجود ملک کا معاشی نظام کام کر رہا ہے۔
مرکزی بینک کے گورنر کے مطابق ایرانی کرنسی کی قدر میں کمی کی بڑی وجہ حقیقی معاشی عوامل کے بجائے موجودہ نفسیاتی فضا ہے۔
عبدالناصر ہمتی نے کہا کہ ایران کے پاس دیگر وسائل بھی موجود ہیں تاہم ان کی تفصیلات نہیں بتائی جا سکتیں۔
ان کا کہنا ہے کہ روزمرہ ضروریات کا انتظام مشکل ضرور ہوا ہے لیکن ایرانی معیشت کبھی تباہ نہیں ہوئی اور نہ ہو گی، صورتِ حال جَلد معمول پر آ جائے گی۔
