جنوبی کوریا میں مقیم مشہور جاپانی ٹک ٹاکر اور کے پاپ گروپ ’این ہائپن‘ کی مداح میناچن نے ٹک ٹاک لائیو اسٹریم کے دوران خودکشی کر لی۔
غیر ملکی میڈیا کے مطابق 5 اگست کی صبح لائیو اسٹریم کے دوران ناظرین کی جانب سے اطلاع ملنے پر سیول کی یونگسان پولیس نے ان کے گھر پہنچ کر لاش برآمد کی۔ وہ جنوبی کوریا میں رہائش پذیر تھیں جبکہ ٹک ٹاک پر انکے 80 ہزار فالوورز تھے۔
میناچن کی چھوٹی بہن نے انسٹاگرام پر ایک پیغام کے ذریعے ان کی موت کی تصدیق کی۔
رپورٹس کے مطابق گزشتہ ماہ امریکہ میں این ہائپن کے ایک شو کے دوران میناچن نے بینڈ کے ممبر ’سونو‘ سے درخواست کی تھی کہ وہ ان کے لائے ہوئے پھول دوسرے جاپانی ممبر ’نیکی‘ تک پہنچا دیں۔
اس واقعے کے بعد بینڈ کے دیگر مداحوں نے ان پر حد سے تجاوز کرنے کا الزام لگایا اور ان کے خلاف سوشل میڈیا پر ٹرولنگ شروع کردی۔
میناچن نے 31 جولائی کو ’ایکس‘ پر ایک طویل معافی نامہ پوسٹ کرتے ہوئے لکھا تھا، ’مجھے لگتا ہے کہ میں نے سونو کی شرافت کا غلط فائدہ اٹھایا، جس پر میں تہہ دل سے معذرت خواہ ہوں۔‘
انہوں نے اپنے پیغام میں کہا، ’کئی بار فین سائنز میں شرکت کے بعد مجھے یہ غلط فہمی ہوگئی تھی کہ میں بینڈ کے ممبرز کے بہت قریب ہوں۔‘
معافی مانگنے کے باوجود ان کے خلاف آن لائن نفرت انگیز تبصروں اور بدسلوکی کا سلسلہ نہ تھما جس کے باعث انفلوئنسر نے انتہائی قدم اٹھالیا۔
