بھارتی ریاست راجستھان کے شہر جیسلمیر میں فوجی اسٹیشن کے قریب فوج کی اسپورٹس یوٹیلیٹی گاڑی اونٹ سے جا ٹکرائی جس کے نتیجے میں 30 سالہ میجر حمزہ عارف جاں بحق جبکہ 2 لیفٹیننٹ زخمی ہو گئے۔
بھارتی میڈیا کے مطابق حادثہ جمعرات کی رات اس وقت پیش آیا جب 3 فوجی افسر شہر سے فوجی اسٹیشن واپس جا رہے تھے، فوجی عجائب گھر کے قریب ایک اونٹ اچانک گاڑی کے سامنے آ گیا جس کے نتیجے میں گاڑی اس سے ٹکرا گئی۔
ٹکر کے بعد گاڑی تقریباً 5 بار الٹی اور 100 میٹر تک گھسٹتی چلی گئی، حادثے میں اونٹ بھی موقع پر ہی ہلاک ہو گیا۔
بھارتی میڈیا کے مطابق فوجی اہلکاروں نے فوری طور پر جائے وقوع پر پہنچ کر تینوں افسروں کو گاڑی سے نکالا اور فوجی اسپتال منتقل کیا جہاں میجر حمزہ عارف زخموں کی تاب نہ لاتے ہوئے دم توڑ گئے۔
زخمی ہونے والے لیفٹیننٹ ابھینیو راٹھور اور لیفٹیننٹ آیوشمان فوجی اسپتال میں زیرِ علاج ہیں تاہم ان کی حالت کے بارے میں سرکاری طور پر کوئی تفصیلات جاری نہیں کی گئیں۔
پولیس کا کہنا ہے کہ حادثے کے بعد گاڑی بے قابو ہو کر فوجی حدود کی دیوار کے قریب جا کر رکی تھی، میجر حمزہ عارف کی میت پوسٹ مارٹم کے لیے جواہر اسپتال منتقل کر دی گئی ہے۔
بھارتی میڈیا کا کہنا ہے کہ میجر حمزہ عارف کا تعلق مدھیہ پردیش کے شہر اندور سے تھا اور ان کی شادی 1 ماہ قبل ہی ہوئی تھی۔
بھارتی میڈیا کے مطابق یہ حادثہ اسی مقام کے قریب پیش آیا ہے جہاں تقریباً 1 سال قبل 1 نجی بس میں آگ لگنے سے 29 افراد ہلاک ہوئے تھے۔
