گریٹر مانچسٹر میں میئر کے ضمنی انتخاب کے لیے آج ووٹنگ ہوگی۔ اس انتخاب میں لیبر پارٹی اور گرین پارٹی سمیت چھ امیدوار حصہ لے رہے ہیں۔
یہ نشست اینڈی برنہم کے استعفے کے بعد خالی ہوئی، جنہوں نے میکر فیلڈ حلقے سے پارلیمانی نشست حاصل کی اور بعد ازاں برطانیہ کے وزیراعظم بن گئے۔
گریٹر مانچسٹر کے 10 کونسل علاقوں میں ووٹنگ ہوگی، جن میں مانچسٹر، بولٹن، سالفورڈ، بَری، اسٹاکپورٹ، ٹیم سائیڈ، اولڈہم، ٹریفورڈ، روچڈیل اور ویگن شامل ہیں۔
پولنگ اسٹیشنز صبح 7 بجے سے رات 10 بجے تک کھلے رہیں گے۔ ووٹ ڈالنے کے لیے پولنگ اسٹیشن پر تصویری شناختی دستاویز (Photo ID) ساتھ لانا ضروری ہے، پوسٹل بیلٹ پہلے ہی جاری کیے جا چکے ہیں۔
انتخاب میں حصہ لینے والے امیدواروں میں ریسٹور برطانیہ کے مارلن ویسٹ، ریفارم یوکے کی سیان ایسٹلی، گرین پارٹی کی جیرالڈین کوگنز، لبرل ڈیموکریٹس کے رچرڈ کلپٹرک، لیبر پارٹی کی بیو کریگ اور کنزرویٹو پارٹی کے فل ایکرزلی شامل ہیں۔
سیاسی مبصرین کے مطابق لیبر پارٹی اور گرین پارٹی کے درمیان سخت مقابلہ متوقع ہے۔ دونوں جماعتیں اس سے قبل بھی دو انتخابات میں ایک دوسرے کا مقابلہ کر چکی ہیں۔
گورٹن کے پارلیمانی ضمنی انتخاب میں گرین پارٹی کی امیدوار ہنّا اسپینسر نے لیبر پارٹی کو تیسرے نمبر پر پہنچا دیا تھا، جبکہ حالیہ مقامی کونسل انتخابات میں بھی گرین پارٹی نے کامیابی حاصل کی۔
ذرائع کے مطابق لیبر پارٹی بائیں بازو کے ووٹرز کا اعتماد دوبارہ حاصل کرنے کی کوشش کر رہی ہے، اس لیے اس بار گریٹر مانچسٹر کے میئر کے انتخاب میں سخت مقابلے کی توقع ہے۔
