امریکا نے ایران کی ماہان ایئر کی معاونت کرنے والے عالمی نیٹ ورکس پر نئی پابندیاں عائد کر دیں۔
غیر ملکی خبر رساں ادارے کے مطابق امریکا کا کہنا ہے کہ ایرانی فضائی کمپنی پاسدارانِ انقلاب کے اہلکاروں کے علاوہ ہتھیاروں اور ڈرونز کی منتقلی میں بھی کردار ادا کرتی ہے۔
امریکی محکمۂ خزانہ نے ایک بیان میں کہا ہے کہ اس نے چین، بھارت، روس اور ایران میں موجود 6 اداروں اور افراد کو پابندیوں کی فہرست میں شامل کیا ہے۔
ان میں کئی ایسی کمپنیاں بھی شامل ہیں جو امریکا اور یورپی یونین کی پابندیوں کا سامنا کرنے والی مذکورہ فضائی کمپنی کے لیے سیلز ایجنٹس کے طور پر کام کرتی ہیں۔
یہ اقدام ایسے وقت میں سامنے آیا ہے جب مصر کی بحیرۂ روم کی بندرگاہ دمیاط میں گیس بردار بحری جہازوں پر ڈرون حملے نے امریکا اور ایران کے درمیان جاری کشیدگی میں ایک ممکنہ نئے محاذ کے خدشات پیدا کر دیے ہیں۔
