امیتابھ بچن اور پروین بابی کسی زمانے میں ایک بہت کامیاب اور مقبول جوڑی ہوا کرتے تھے۔ شائقین فلم نے دیوار اور کالا پتھر جیسی فلموں میں ان کی آن اسکرین کیمسٹری کو بہت پسند کیا۔
اگرچہ ساتھ کام کرتے ہوئے ان دونوں کے درمیان دوستی قائم ہو گئی تھی، لیکن یہ افواہیں بھی گرم تھیں کہ امیتابھ جیا بچن سے شادی شدہ ہونے کے باوجود پروین کے ساتھ تعلق میں تھے۔ اطلاعات کے مطابق بعد میں امیتابھ نے پروین سے دوری اختیار کر لی، جو پروین کو ناگوار گزری۔
بھارتی اخبار کی رپورٹ کے مطابق پروین نے اس کے بعد ایک میگزین کو بتایا کہ امیتابھ بچن ایک سپر انٹرنیشنل گینگسٹر ہے۔ وہ میری جان کے پیچھے پڑا ہوا ہے۔ اس کے غنڈوں نے مجھے اغوا کیا اور مجھے ایک جزیرے پر رکھا گیا جہاں انہوں نے میرا آپریشن کر کے میرے کان کے بالکل نیچے ایک ٹرانسمیٹر یا چپ لگا دی۔
پروین کے ان الزامات نے سب کو ہلا کر رکھ دیا تھا۔ انہوں نے امیتابھ بچن کے خلاف پولیس میں شکایت بھی درج کرائی۔
تاہم، بعد میں یہ بات سامنے آئی کہ وہ شیزوفرینیا نامی بیماری کا شکار تھیں، یہ ایک ذہنی عارضہ ہے جو انسان کی سوچنے اور سمجھنے کی صلاحیت اور رویے کو متاثر کرتا ہے۔
امیتابھ بچن نے بعد میں ان الزامات پر اپنا ردعمل دیتے ہوئے کہا کہ ان کی بیماری کی نوعیت ایسی تھی کہ وہ لوگوں سے خوفزدہ رہتی تھیں اور ہر قسم کے شدید وہموں اور مغالطوں کا شکار ہو جاتی تھیں۔
2004 میں وفات سے محض ایک سال پہلے پروین کی ایک ہوٹل میں اپنے سابق دوست اور اداکار کبیر بیدی سے ملاقات ہوئی۔
سدھارتھ کنن کو دیے گئے ایک سابقہ انٹرویو میں کبیر بیدی نے بتایا کہ وہ پروین کے پاس گئے اور انہیں سلام کیا، لیکن انہوں نے ایک نمایاں اداسی کے ساتھ جواب دیا اور کہا کہ لوگ سمجھتے ہیں کہ وہ پاگل ہیں۔ کبیر نے انہیں تسلی دینے کی کوشش کی، لیکن اچانک ان کے چہرے کے تاثرات بدل گئے۔
کبیر نے ان کے الفاظ یاد کرتے ہوئے بتایا کہ "تم بھی انہی لوگوں میں سے ہو۔ تم بھی یہی سمجھتے ہو کہ میں پاگل ہوں۔”
کبیر بیدی نے اعتراف کیا کہ ان کے اس جملے نے انہیں اندر تک جھنجھوڑ کر رکھ دیا۔ پھر پروین نے ان سے کہا کہ انہیں چلے جانا چاہیے اور وہ چلے گئے۔ یہ ان دونوں کی آخری ملاقات تھی۔
کبیر نے بعد میں بتایا کہ یہ آخری ملاقات ہمیشہ ان کے ذہن پر نقش رہی۔
اپنے دور کی سب سے معروف اور کامیاب ترین اداکاراؤں میں سے ایک، پروین بابی کا انتقال 20 جنوری 2005 کو ہوا۔ افسوسناک بات یہ ہے کہ وہ اپنے فلیٹ میں مردہ پائی گئیں اور اطلاعات کے مطابق ان کی لاش ملنے سے پہلے کئی دنوں تک وہیں پڑی رہی تھی۔
